TIRANË– Arlind Qorri, kryetar i “Lëvizja Bashkë” deklaroi në emisionin “Stay Tuned” me moderatoren Valbona Mhilli se rezultati i partisë PSD në zgjedhjet e 14 majit është një shenjë e keqe për demokracinë në Shqipëri, duke shtuar se marzhet e suksesit të partive klienteliste janë të kufizuara. Duke vijuar më tej, Qori tha sesa kohë qeveris Rama, Berisha dhe Basha ata do të kenë nevojë për ‘paterica’, parti të vogla që i sigurojnë pushtetin kur përçahen së brendshmi.
“PSD është një parti që po të pyesësh kryetarin e saj si quhet besoj që nuk e di. Po të pyesësh Doshin si quhet, përtej akronimit besoj se rri njëherë dhe mendohet pasi nuk ia ka idenë. Është ironike, pasi partitë socialdemokrate në Evropë kanë një lloj dinjiteti, janë parti të themeluara në shekullin XIX, kanë mbajtur mbi shpinë ndërtimin e shtetit social në ato vende. Në Shqipëri katandisen në parti klienteliste, të fortësh. Mendoj se rezultati i asaj partie është një shenjë e keqe për Shqipërinë, për demokracinë. Nuk më habit se e di që parti të tilla, klienteliste kanë një lloj suksesi, por marzhet e këtij suksesi janë të kufizuara. Partitë e këtij lloji nuk do e arrijnë kurrë 3-4% të elektoratit. Janë të zonjat për faktin se drejtohen nga njerëz të fortë, me kontakte me botën kriminale, me kontakte me sipërmarrës të fuqishëm. Por nuk arrin dot të blesh 30-40% të votave të një shoqërie. Mund të blesh 3-4-5% por jo më shumë. Nuk shoh që ajo parti do të ketë një farë perspektivë sa kohë nënat e tyre do të kenë nevojë për një patericë. Këto parti do të shërbejnë si një patericë e partive të mëdha por me transformimet që besoj se do të ndodhin, parti të tilla do të jenë të margjinalizuara dhe nëse do vazhdojnë të ekzistojnë. Sa kohë që qeveris Rama, Berisha, Basha ata kanë nevojë për paterica, parti të vogla që i sigurojnë pushtetin kur çahen së brendshmi”.
