TIRANË– Kryeministri Edi Rama s’e ka fshehur sërish miqësinë me presidentin e Serbisë Aleksadër Vuçiç, të cilit i ka bërë sërish “avokatin” në arenën ndërkombëtare. Kështu gjatë një interviste në emisionin italian “Porta e Porta” kreu i qeverisë shqiptare kërkoi që Bashkimi Europian të qëndrojë më afër Serbisë, pavarësisht se kjo e fundit do e këtë gjithmonë një “këmbë” nga Rusia, me të cilën ka dhe lidhje ekonomike.
Edi Rama: Jo, jo vetëm që nuk i trembemi kësaj, por jemi një zë mjaftueshëm i dalluar në Ballkanin Perëndimor që thotë se duhet ta mbajmë Serbinë shumë pranë dhe duhet të bëjmë gjithçka që të jemi të bashkuar politikisht. Nga ana tjetër, sigurisht që ka dallime sepse Serbia nuk e ka sanksionuar Rusinë për arsye të qarta që në një moment duhet kuptuar se ato janë arsye të natyrës politike dhe historike, por edhe të natyrës pragmatike. Duhet të bëjmë gjithçka për të shmangur që pasioni luftarak, le të themi, të mos na përfshijë edhe ne në krijimin e mosmarrëveshjeve mes vendeve anëtare të NATO-s dhe pro NATO-s në Ballkan dhe mes Serbisë dhe komuniteteve që i përkasin një bote sllavo-ortodokse, që është e lidhur ngushtë me Rusinë.
Vittoriana Abate: A mund të mendohet një Bashkim Europian që përfshin Shqipërinë dhe vendet e tjera të Ballkanit pa Serbinë?
Edi Rama: Jo, për mendimin tim jo.
Vittoriana Abate: Çfarë skenari mund të imagjinoni në këtë fazë të konfliktit?
Edi Rama: Mundësia më e madhe është që ky është një nga konfliktet e ashtuquajtura të ngrira, por me një dimension mjaft mbresëlënës që mund të marrë peng jo vetëm Rusinë dhe Ukrainën, por të gjithë botën për një periudhë të gjatë kohore. Dhe, nëse rusët kanë qenë gjithmonë luftëtarë mjaft të ashpër, ukrainasit janë të njëjtë. Kështu të thuash që këtu mund të vendoset pa ata, më duket mjaft e vështirë.
Dhe më herë kryeministri Edi Rama gjatë intervistave të tij për mediat ndërkombëtare duket se ka bërë “avokatin e djallit” sa i përket Aleksandër Vuçiç dhe sjelljeve të tij me Bashkimin Europian dhe miqësinë e tij me presidentin rus Vladimir Putin. Kujtojmë se Serbia nuk mori pjesë në saksionet ekonomike që Unioni vendosi për Rusinë për shkak të agresionit të saj në Ukrainë.
