TIRANË– Kryeministri Edi Rama gjatë takimit me mjekët me rastin e festave të fundvitit tha që ai dhe qeveria e tij nuk e ndalon dot largimin e mjekëve dhe infermierëve drejt Gjermanisë. Kreu i qeverisë tha se shteti gjerman i pret me krahë hapur mjekët nga vendi ynë pasi habiten me dijen që ata kanë. Rama zbuloi dhe një bisedë që kishte pasur me një përfaqësues të lartë në Gjermani që i kishte treguar se mjekët shqiptarë janë shembull shumë habitës sepse kanë dije të spikatura mes mjekëve që vijnë jashtë BE-së.
Edi Rama: Do ta lë për në fund ëmbëlsirë ne Universitetit të mjekësisë, është një burim krenarie, jo vetëm për faktin që përball një fluks të madh kërkesash, por cilësinë e mësimdhënies e aprovon, certifikon e akrediton edhe në një mënyrë tjetër, përmes të gjithë atyre që priten krahëhapur në tregun evropain e sidomos në Gjermani, sepse zotërojnë dije që i bëjnë të kërkuar për atë treg. Kam pasur një bisedë me një nga autoritetet e larta gjermane, lidhur me këtë fakt që shteti shqiptar shpenzon jo pak për formimin e mjekëve të rinj, ndërsa shteti gjerman i merr gati. Në këtë pikë nuk ka shumë për të bërë, është liria e lëvizjes, liria e zgjedhjes, por ne po përpiqemi të kompensohemi dhe gjëja që dua të sjell nga ajo bisedë është se mjekët që vijnë nga Shqipëria janë një shembull shumë habitës sepse kanë dije të spikatura mes mjekëve që vijnë jashtë BE-së. Kjo na bën të mendojmë se nuk e njohin shumë mirë Shqipërinë, duke qenë se Shqipëria nxjerr këto lloj mjekësh.
