CËRRIK– Kryeministri Edi Rama është ndalur në Cërrik në kuadër të turit të tij për prezantimin e kandidatëve të Partisë Socialiste për bashkitë e vendit në zgjedhjet vendore të 14 majit. Nga Cërriku Rama tha se dyshja Berisha-Meta i duan bashkitë e vendit si një formë presioni ndaj qeverisë. Po ashtu kreu i qeverisë kishte dhe një mesazh për dy liderët e opozitës Sali Berishën dhe Ilir Metën. Gjatë fjalës së tij Rama tha se nuk ka ndërmend të iki pavarësisht se “ata” kanë dhjetëve vite që thonë “Rama ik”.
Edi Rama: Vijnë nga e shkuara, s’kanë bërë asgjë, madje kanë bërë më shumë dëm. Vijnë jo për të bë më shumë punë, por për të marrë peng bashkitë për t’i kthyer në kështjella të luftës politike me qeverinë, vijnë për të mbyllur investimet, për t’i mbyllur rrugët zhvillimit bashkëpunimit dhe për të fillua avazin nga e para, dhe për ti harxhuar lekët e taksave për të financuar autobusë që nisën në tiranë për të thënë Rama ik. Kanë 10 vite që e thonë, unë skam ndërmend të iki se thonë ata Rama ik, do vijë edhe dita ime për tu larguar, por ajo ditë do vijë kur ne të vendosim bashkërisht, po ata nuk vendosin dot atë ditë.
