TIRANË– Kryeministri Edi Rama ka bërë të ditur se duke filluar nga muaj prill do të nisë dhe mbledhja e tasksës së jashtëzakonshme për prodhuesit e energjisë. Lajmin e bëri të ditur në një postim në Facebook ndërkohë që mbledhja e qeverisë në vilën qeveritare “Vila 31” në ish-Bllok vazhdon që prej orëve të para të mëngjesit. Sipas kreut të Qeverisë, kjo taksë do t’i shërbejë për të mbështetur në radhë të parë pensionistët e më pas kategorive që janë më në nevojë.
“Në prill mblidhet kësti i parë i Taksës së Jashtëzakonshme mbi prodhuesit e mëdhenj të energjisë dhe siç jemi zotuar, kjo taksë do të shërbejë për të mbështetur në radhë të parë pensionistët, e sipas mundësisë dhe radhës kategori të tjera më në nevojë”, shkruan Rama.
Kryeministri Edi Rama prej dy ditësh po zhvillon një mbledhje maratonë në ambientet e vilës qeveritare “Vila 31” në zonën e ish-Bllokut. Në mbledhje me atë që bën të ditur dhe kryeministri po bëhet një analizë e punës së 12 muajve të shkuar dhe objektivat e këtij viti që sapo hymë. Në mbledhje marrin pjesë të gjithë ministrat e qeverisë, të cilët po raportojnë tek kreu i ekzekutivit projektet dhe objektivat e dikastereve që drejtojnë.
