Gazetari Julian Hoxhaj deklaron se Prokuroria ka qenë në dijeni tre muaj përpara zgjedhjeve për emrat e personave të dyshuar se ndihmuan Edi Ramën të sigurojë mandatin e katërt nëpërmjet asaj që ai e quan “krim elektoral”.
Sipas tij, situata është bërë e vështirë për Kryeministrin, pasi tashmë kritikat nuk po vijnë vetëm nga opozita, por edhe nga kandidatët e partisë së tij, të cilët kanë filluar të denoncojnë publikisht parregullsitë zgjedhore të datës 11 maj.
“Po përdoret çdo mjet për të larguar vëmendjen nga ajo që ndodhi me zgjedhjet, brenda vendit dhe me votën e diasporës,” – shprehet Hoxhaj.
Ai thekson se urdhër-arrestet janë lëshuar që në muajin shkurt nga autoritetet italiane, duke përfshirë persona që dyshohet se kanë pasur rol në fushatën zgjedhore. Kjo tregon se drejtësia shqiptare dhe institucionet shtetërore kanë qenë në dijeni shumë kohë përpara mbajtjes së zgjedhjeve.
“Besoj se këto emra janë ditur nga institucionet, përfshirë edhe Kryeministrin dhe ministrat, të cilët ndërveprojnë me palën italiane për zhvillimin e operacionit. Por ky operacion po përdoret edhe për të mbuluar denoncimet që po vijnë nga vetë kandidatët e mazhorancës,” – thekson ai.
Sipas Hoxhajt, ka presion ndaj kandidatëve për të heshtur, duke i kërcënuar se nuk do të marrin poste nëse flasin për manipulimet. Ai thekson se personazhet kyç të dosjes ende nuk janë përballur me drejtësinë, ndonëse emrat e tyre janë të njohur prej kohësh.
