Rama: Shqipëria s’ka kohë për të humbur me askënd që vazhdon me ‘orën e vjetër’

Kreu i qeverisë ka reaguar pas dekretimit nga Presidenti i vendit të ligjit për Komisionet Parlamentare, duke iu përgjigjur akuzave të opozitës.

Në një reagim në platformën X, Edi Rama shprehet se ka perënduar koha politike kur Presidenti i Republikës bashkëudhëhiqte revolucionet imagjinare kundër qeverisë.

Sipas tij Shqipëria s’ka asnjë sekondë për të humbur me askënd që “vazhdon me orën e vjetër, duke kërkuar nëpër rrugicat e ngushta të Kuvendit a të zonës rreth tij,  rikthimin e kohës së vdekur”.

Reagimi i plotë i Edi Ramës:

Ka perënduar me kohë koha politike kur Presidenti i Republikës bashkëudhëhiqte revolucionet imagjinare kundër qeverisë e në dëm të Shqipërisë, duke e përdorur Kushtetutën si koktej Molotov, siç do të mbarojë po njësoj, më shpejt se sa vonë, edhe ora e keqkuptimit të madh të politikës së ditës, mes punës mendore të parlamentarëve dhe aktivitetit fizik të tyre në sallën e Kuvendit të Shqipërisë!

Prandaj Shqipëria s’ka asnjë sekondë për të humbur me askënd që vazhdon me orën e vjetër, duke kërkuar nëpër rrugicat e ngushta të Kuvendit a të zonës rreth tij,  rikthimin e kohës së vdekur.