TIRANË– Kryeministri Edi Rama e ka nisur javën duke shpërndarë një foto që sipas tij pasqyron premtimin e mbajtur të qeverisë për rritjen e pagave. Përmes një postimi në Facebook kreu i qeverisë shprehet se dixhitalizimi i një sërë shërbimesh kanë bërë që të ulet korrupsioni në tërësi, të forcohet shteti dhe t’i krijohet mundësia për të bërë rritje pagash. Sot një mjeke pediatre shkruan Rama paguahet 220 300 lekë të rinj falë rritjes së pagave.
POSTIMI:
PAGAT E REJA, falë të cilave paga mesatare në Shqipëri thuajse dyfishohet duke arritur majën historike të 900Eurove në 2024, janë frut i një përpjekjeje të gjatë, këmbënguljeje e durimi të madh për reforma të vështira e masa të domosdoshme për ekonominë dhe për financat tona, rritjeje të të ardhurave falë rritjes së ekonomisë, tregtisë, investimeve publike e private, rritjes së prodhimit e të eksporteve, modernizimit të sistemit të mbledhjes së taksave përmes kompjuterizimit të transaksioneve në kohë reale, lehtësimit e rritjes së shpejtësisë së shërbimeve për biznesin falë digjitalizimit të tyre, forcimit të shtetit në tërësi dhe uljes së ndjeshme të korrupsionit në tatime e dogana, po mbi të gjitha, PAGAT E REJA janë frut i punës sonë të përbashkët, të çdo shqiptari e shqiptareje, që në shtet a në privat, kontribuon për ekonominë shqiptare me punën e vet.
