BRITANI- Tre shqiptarë kanë rënë në prangat e Policisë britanike pasi u kapën në flangrancë brenda një “shtëpie bari” në Southamton. Selami Lugja, Alfred Mamoçi dhe Rezart Selami deklaruan në seancën gjyqësore se ishin detyruar të kryenin veprimtarinë kriminale për të shlyer borxhin prej 25 mijë paundësh që kishin marrë për të ardhur ilegalisht në Britaninë e Madhe.
Ata ranë rastësisht në “rrjetën” e policisë pasi agjentët kishin nisur kërkimet në atë zonë për një person të zhdukur. Banesa që ata përdornin për kultivimin e kanabisit lëshonte një nxehtësi të pazakontë që ngjalli dyshime tek oficerët. Kur këta të fundit bastisën banesën, Mamoçi 36 vjeç dhe Selami, 29 vjeç tentuan të arratiseshin duke vrapuar nëpër çati por nuk ia dolën. Ndërsa Lugja u kap sapo u hodh nga çatia për të ja mbathur
Oficerët gjetën tre dhoma për rritjen e kanabisit, një frigorifer, një zonë gatimi dhe një dhomë gjumi. Ata kishin kryer shelke me energjinë elektrike e cila ishte devijuar nga rrjeti elektrik. Vlera e kanabisit të zbuluar në shtëpinë e barit kapte vlerën deri në 535 mijë paund. Të tre të arrestuarit u shpallën fajtorë nga gjykata. Avokati i tyre tha se shqiptarët paguheshin nga 5 mijë deri në 18 mijë paund pas tharjes së bimës narkotike. Shqiptarët mësohet të kenë thënë se ishin gënjyer nga trafikantët e drogës për një jetë më të mirë pasi në Shqipëri jetesa ishte e vështirë për t’u përballuar.
