SHBA- Shefi i OKB-së Antonio Guterres ka njoftuar publikimin e një raporti mbi ndryshimin e klimës, duke e cilësuar një udhëzues mbijetese për njerëzimin. Në raport theksohet se energjia dhe teknologjia e pastër mund të shfrytëzohen për të shmangur katastrofën klimatike. Po ashtu në raportin e publikuar nga shkencë tarë t tregohet se si reduktimet e karburanteve fosile mund të shmangin efektet më të këqija të ndryshimit të klimës. Në përgjigje të gjetjeve, sekretari i përgjithshëm i OKB-së Antonio Guterres tha se të gjitha vendet duhet të shkurtojnë me shpejtësi emetimet e gazeve serrë që ngrohin atmosferën e planetit tonë.
Qeveritë kishin rënë dakord më parë për të shmangur rritjen e temperaturës globale mbi 1.5C. Por temperaturat tani janë rritur me 1.1C dhe tani ekspertët thonë se ka të ngjarë të kalojë 1.5C në vitet 2030. Studimi i tyre i ri synon të përmbledhë në një vëllim të vogël disa gjetje historike mbi shkaqet, ndikimet dhe zgjidhjet ndaj ndryshimeve klimatike që janë publikuar që nga viti 2018.
Ai përshkruan ndikimet e rëndësishme që ndryshimi i klimës ka në botë tashmë dhe shpjegon se këto do të përkeqësohen shumë. Përqendrimet e gazit CO2 në atmosferë janë më të lartat në 2 milionë vjet. Bota tani është më e ngrohtë se në çdo kohë në 125,000 vitet e fundit dhe ka të ngjarë të bëhet më e ngrohtë gjatë dekadës së ardhshme. Autorët thonë se janë optimistë se ndryshimet dramatike mund të arrihen me shpejtësi, duke vënë në dukje rënien masive të çmimit të energjisë së prodhuar nga dielli dhe era.
Por raporti gjithashtu pranon se përveç arritjes së emetimeve neto zero sa më shpejt të jetë e mundur, do të nevojitet përdorimi në shkallë të gjerë i teknologjisë së heqjes së dioksidit të karbonit. Shkencëtarët thonë se ky është një plan realist për të rikthyer nën kontroll temperaturën e Tokës dhe për ngrohjen nën 1.5C.
