Reciprociteti/ Tensionohet situata në veri të Kosovës. KFOR: Gati për ndërhyrje nëse cenohet stabiliteti

Tensionohet situata në veri të Kosovës. Serbët kanë bllokuar me kamionë, dhe me mjete tjera, rrugët që çojnë drejt dy pikëkalimeve kufitare që lidhin Kosovën dhe Serbinë – Jarinjë dhe Bërnjak.

Situata është agravuar vetëm një ditë para se të hyjnë në fuqi dy vendime të Qeverisë së Kosovës që kanë të bëjnë me targat dhe dokumentet serbe.

Kryeministri i Kosovës, Albin Kurti, bëri përgjegjës për tensionin e krijuar presidentin serb, Aleksandar Vuçiq dhe drejtorin e Zyrës për Kosovën në Qeverinë serbe, Petar Petkoviq.

Ndërsa ky i fundit akuzon Kurtin për krizën.

“Fajtori i vetëm për situatën aktuale në Kosovë dhe Metohi është Alibin Kurti, i cili me lëvizjet e tij të papërgjegjshme po shkakton krizë të re në territorin e Kosovës dhe Metohisë”, ka thënë Petkoviq në një deklaratë me shkrim.

Ndërkohë, ambasadori amerikan, Jeffrey Hovenier, ka nisur një takim ka thirrur në një takim presidenten e Kosovës, Vjosa Osmani dhe kryeministrin Kurti.

Policia e Kosovës ka njoftuar më herët gjatë ditës se ka mbyllur pikëkalimet kufitare Jarinjë dhe Bërnjak – për qarkullim të udhëtarëve dhe automjeteve – për shkak të bllokadave të vendosura dhe ka njoftuar qytetarët që të përdorin rrugë alternative.

KFOR: Gjendja e përgjithshme e sigurisë në komunat veriore të Kosovës është e tensionuar

Përmes një deklarate për mediat, KFOR-i ka thënë se janë të përgatitur për të ndërhyrë nëse rrezikohet stabiliteti.

“Misioni i KFOR-it i udhëhequr nga NATO po monitoron nga afër dhe është i përgatitur të ndërhyjë nëse rrezikohet stabiliteti, në përputhje me mandatin e tij, që vjen nga Rezoluta 1244 e OKB-së e vitit 1999. Misioni ynë i KFOR-it i udhëhequr nga NATO është plotësisht i fokusuar në zbatimin e përditshëm të mandatit të tij të OKB-së për të siguruar një mjedis të sigurt dhe të sigurt dhe lirinë e lëvizjes për të gjithë popullin e Kosovës. KFOR-i mban një qëndrim të dukshëm dhe të shkathët në terren dhe komandanti i KFOR-it është në kontakt me të gjithë bashkëbiseduesit e tij kryesorë, përfshirë përfaqësuesit e organizatave të sigurisë së Kosovës dhe shefin serb të Mbrojtjes”, thuhet në komunikatën e KFOR-it.