KRUJË– Agjentët e Byrosë Kombëtare të Hetimit të mbështetur dhe nga forcat speciale RENEA kanë mësyrë ditën e sotme në vilën e trekatëshe të Ramazan Rrajës, i cili është shpallur në kërkim nga Policia pasi akuzohet për atentatin ndaj prokurorit Arjan Ndoja. Operacioni është zhvilluar në orët e para të mëngjesit dhe për dy orë rresht agjentët kanë kontrolluar çdo cep të shtëpisë. Xhungël.al shkruan se brenda vilës kanë gjetur vetëm deputetin e Partisë Socialiste Rrahman Rraja dhe familjen e tij.
Urdhri për kontrollin në banesë është lëshuar në mënyrë sekrete nga Gjykata e Posaçme Kundër Korrupsionit dhe Krimit të Organizuar pas kërkesës së SPAK. Qëllimi i kontrollit të banesës dhe automjetit, ishte gjetja apo zbulimi i provave me rëndësi për hetimin që po kryen SPAK, por asgjë e tillë nuk ka ndodhur. Vetë deputeti i PS-së Rrahman Rraja ka deklaruar para efektivëve se në atë vilë jeton ai bashkë me familjen, ndërsa nipi i tij Ramazan Rraja prej kohësh është zhvendosur në Tiranë.
