Kryebashkiaku Erion Veliaj ende vijon turin falenderues në të gjitha njësitë e Tiranës. Këte të martë Veliaj u ndal duke falenderuar banorët e Baldushkut dhe Petrelës. Në fjalët e tij kryebashkiaku tha se për Partinë Socialiste çdo ditë është fushatë, ndaj edhe pas kësaj fitoreje duhet punuar për atë të radhës, zgjedhjet e vitit 2025.
”Nuk vijmë të krekosur, por vijmë të përulur, që t’i mbarojmë këto punë. Nëse ne kthehemi me përulësi, ju garantoj se Baldushku do na japë gjithmonë e më shumë vota, gjithmonë e më shumë mbështetje, gjithmonë e me shumë përkrahje,” -shtoi Veliaj.
Sakaq ai tha se pas fitores për qytetarët tanimë bashkia e Tiranës do të jetë gjithnjë shërbëtore përpara problemeve të tyre! Në fund, Veliaj shprehu se mbështetja e qytetarëve ka ardhur edhe për përfaqësuesit e PS në Këshillin bashkiak.
“Një makinë e shpejtë, që s’ka karburant, për çfarë duhet?! Karburanti ishte vota për Këshillin Bashkiak. PS tregoi se ka disiplinë dhe siç morëm votat për kryetar, morëm edhe votat për këshillin.”– përfundoi ai.
FJALA E ERION VELIAJ:
“Mund të tregohemi fodullë, se rezultati është aq i madh saqë mund t’i hipë kollaj vetja në qejf kujtdo, por unë besoj se kjo nuk është formula e duhur. Ne e kemi provuar edhe në Farkë, edhe në Petrelë, kur pas fitores jemi kthyer me përulësi dhe u themi njerëzve se këta janë numra për të shërbyer. Ne nuk vijmë këtu si ‘shefa’, ne vijmë si shërbëtorë. Nuk vijmë të krekosur, por vijmë të përulur, që t’i mbarojmë këto punë. Nëse ne kthehemi me përulësi, ju garantoj se Baldushku do na japë gjithmonë e më shumë vota, gjithmonë e më shumë mbështetje, gjithmonë e me shumë përkrahje. Për Partinë Socialiste çdo ditë është fushatë, ndaj edhe pas kësaj fitoreje duhet punuar për atë të radhës, zgjedhjet e vitit 2025. Kush punon fushën, kush punon arat, kush rri nëpër kodra dhe male, e di që mund të jetë e vështirë me e ngjit një kodër ose mal, por sa hipën te maja e atij mali, sheh majën e malit tjetër. Kështu që, vërtet për 2023 maja e malit të fitores sonë politike ishte rezultati spektakolar që morëm edhe këtu në Baldushk, por kujdes, çdo majë mali është edhe rrëza e një mali tjetër. Tani që kemi hipur në këtë majë mali, shohim maja të tjera. Dhe maja më e afërt që shohim, të cilën duhet ta ngjsim është maja e fitores sonë për 2025-ën.Mbështetja e qytetarëve ka ardhur edhe për përfaqësuesit e PS në Këshillin bashkiak. Një makinë e shpejtë, që s’ka karburant, për çfarë duhet?! Karburanti ishte vota për Këshillin Bashkiak. PS tregoi se ka disiplinë dhe siç morëm votat për kryetar, morëm edhe votat për këshillin. Pala tjetër mori 60% më pak vota për kryetar, por mori edhe 50% më pak vota për këshill, çka dha dy mesazhe: Mesazhi i parë, nuk duhet të luftojmë me Amerikën; mesazhi i dytë, që na dhanë te Këshilli është nuk duan krushqi me Jovan Bregun. Nuk duan dasmën e Saliut me Ilir Metën,”.
