TIRANË– Kreu i Këshillit të Lartë të Prokurorisë Alfred Balla ka reaguar në një deklaratë zyrtare ku ka mohuar të ketë parë, shkarkuar apo përdorur ndonjëherë aplikacionin e Partisë Socialiste ‘Aktiv1sti’. Balla shprehet se nuk e ka as idenë se për çfarë shërben kjo lloj platforme. Ndër të tjera kreu i KLP-së thotë se të gjithë anëtarët e Këshillit të Lartë të Prokurorisë gëzojnë statusin e magjistratit dhe janë të depolitizuar. Reagimi i Alfred Ballës vjen një ditë pasi emri i tij doli në listat e përdoruesve të aplikacionit “Aktiv1sti”.
Emri i Alfred Ballës rezultonte i regjistruar në aplikacion. Madje ka qenë dhe mjaft aktiv pasi ka grumbulluar më shumë se 11 mijë pikë.
REAGIMI:
Kryetari i KLP-së zoti Alfred Balla sqaron gjithë gazetarët e medias në lidhje me citimin e emrit të tij në të ashtuquajturën listë të aktivistëve të partisë Socialiste: Në lidhje me këtë fakt që ai e konsideron të pa vërtetë, zoti Balla është vënë në dijeni nga media. Ai shprehet se nuk e ka shkarkuar, parë dhe përdorur asnjëherë një aplikacionin për të cilin nuk e ka idenë se çfarë përfaqëson. Anëtarët e KLP-së, gëzojnë statusin e magjistratit dhe janë të depolitizuar e të departizuar dhe nuk ka sesi të shkelin ligjin të bëhen anëtarë apo aktivistë të një partie politike e kujtdo krahu qoftë, apo të merren me aktivitet politik gjatë mandatit kushtetues. Ai inkurajon gjithashtu organet e drejtësisë të hetojnë dhe të gjejnë shpërndarësit e këtij lajmi të pavërtetë për të.
