Komisioni Qëndror i Zgjedhjeve vendosi që përsëritja e zgjedhjeve në Bashkinë e Rrogozhinës të mbahen më 23 korrik. Në zgjedhjet e 14 majit, në bashkinë Rrogozhinë triumfoi kandidati i Partisë Socialiste Edison Memolla me 21 vota diferencë nga kandidati i koalicionit ‘’Bashkë Fitojmë’’, Shkëlqim Hoxha. Ky i fundit e kundërshtoi këtë proces duke hedhur dyshime për manipulime tek kutia e burgut, e cila dhe i dha fitoren Memollës.
Por këtë herë regullat kanë ndryshuar, ku të burgosurit nuk do të kenë të drejtën e votës. ‘Në burgun e Rrogozhinës besoj nuk do të votohet, për shkak të mënyrës si është përgatitur lista e zgjedhësve në mospërputhje me kodin zgjedhor, kolegji zgjedhor i shpalli të pavlefshme zgjedhjet, e me ripërsëritjen e tyre, të burgosurit nuk kanë të drejtë vote. Fushata ka shkuar mirë, në KQZ nuk ka pasur shqetësime apo pretendime nga kandidatët, çka është pozitive e shpresoj që edhe në vijim kështu të vazhdoj i gjithë procesi i votimit, ndaj kërkoj vetëpërmbajtje! I nxis njerëzit të shkojnë të votojnë, por të jemi realist koha kur po përsëriten zgjedhjet nuk është e favorshme sepse është periudhë pushimesh e njerëzit nuk ndërmarrin angazhime politike.”- tha Ilirjan Celibashi.
