Pas përfundimit të procesit zgjedhor, në Policinë e Tiranës janë bërë disa lëvizje të rëndësishme në nivele drejtuese. Disa shefa krimesh janë transferuar, duke përfshirë ndërrimin e shefave mes Komisariatit Nr. 5 dhe komisariatit të Vorës. Po ashtu, edhe shefi i krimeve të Komisariatit Nr. 1 është larguar dhe është emëruar në sektorin e aksidenteve pranë Policisë Rrugore.
Ndryshime të dukshme janë bërë edhe në Policinë Rrugore të Tiranës. Rreth 20 efektivë të linjave dhe trafikut janë transferuar, së bashku me 4 komandantë të njësive përkatëse. Ndër këto lëvizje përfshihet edhe zëvendësimi i shefit të trafikut urban, Jetnor Shira, me Megian Ademajn.
Gjithashtu, disa oficerë të policisë gjyqësore janë transferuar brenda strukturave të Policisë Rrugore. Arsyet zyrtare të këtyre ndryshimeve nuk janë bërë publike, por ato lidhen me riorganizimin e brendshëm të forcave të rendit pas zgjedhjeve.
Kujtojmë se vetëm pak muaj më parë u bë një tjetër ristrukturim i gjerë në Policinë e Shtetit, përfshirë emërimin e dhjetëra drejtuesve të rinj në qarqe dhe komisariate.
