Partia Demokratike ka çuar në Kuvend një kërkesë ku thuhet se kreu i Grupit Parlamentar është kryetari i Partisë Demokratike, pasi kjo gjë është sanksionuar në Statutin e PD që u miratua nga Kuvendi Kombëtar në datën 2 shtator.
Një ditë pas Kuvendit, të dielën Lulzim Basha thirri në mbrëmje mbledhjen e Kryesisë, ku u miratuar edhe një rregullore e Grupit Parlamentar.
Rregullorja përmban 17 nene, ku në nenin 6 pika 1 thuhet: “Kryetari i Grupit Parlamentar është Kryetari i Partisë sipas parashikimeve të nenit 48 të statutit të Partisë Demokratike”.
Por vetë Basha ka thënë se nuk do të jetë kryetar i grupit parlamentar, ndërsa atë funksion do ta delegojë tek njëri prej 4 nënkryetarëve të tij zgjedhur, emri i të cilit ende nuk dihet, ndërsa burime bëjnë me dije se emri të cilin Basha po e mendon është Orjola Pampuri.
Sipas rregullores së Grupit Parlamentar edhe detyrat e tjera të grupit parlamentar do t’i zgjedhë Kryesia, por është pikërisht zoti Basha ai që ka në dorë emrat për propozim.
Neni 6 pika 2 e rregullores thotë se: Kryesia e Partisë, me propozim të kryetarit të Partisë , ose ¼ të anëtarëve të GPPD zgjedh nga radhët e saj Nënkryetarin, Sekretarin dhe Zëdhënësin e Grupit Parlamentar.
Gazment Bardhi tha të hënën se shkresa e depozituar në Kuvend është e paligjshme, pasi sipas Bardhit Grupi Parlamentar zgjedh vetë kryetarin e saj, ndërsa kryetarja e Kuvendit, Lindita Nikolla, për shkak se asnjëherë në historinë e parlamentarizmit shqiptar nuk ishte hasur në këtë precedent ka kërkuar interpretimin e kësaj kërkese nga juristët e Kuvendit.
Anëtaret që e kanë nënshkruar rregulloren: Mbledhje e Kryesisë PDSH 03.09.2023
1. Lulzim Basha
2. Arbi Agalliu
3. Mirela Karabina
4. Taulant Zeneli
5. Endri Hasa
6. Kreshnik Collaku
7. Roland Bejko
8. Gentian Gaba
9. Fitim Zekthi
10. Indrit Sefa
11. Gazmend Koduzi
12. Xhemal Gjunkshi
13. Taulanda Jupi
14. Orjola Pampuri
15. Agron Kapllanaj (I pranishëm online)
16. Jemin Gjana (I pranishëm online)
17. Merita Bakiu (E pranishme online)
18. Enkelejd Alibeaj (I pranishëm online)
19. Flutura Açka (E pranishme online)
