TIRANË– Gjykata e Posaçme Kundër Korrupsionit dhe Krimit të Organizuar (GJKKO) ka kaluar këtë të martë për shqyrtim pas një viti pezullim dosjen penale ndaj Dritan Rexhepit dhe grupit të strukturuar kriminal, që akuzohen për rrëmbimin dhe vrasjen e Jan Prengës, trupi i të cilit ende nuk është gjetur.
Jan Prenga u rrëmbye në rrugën “London” në Kamëz dhe u fut me forcë në makinën e autorëve tip Range Rover i bardhë, që rezultoi i vjedhur, dhe pas ngjarjes u gjet i djegur në Shkallnur të Durrësit.
Që prej asaj dite trupi i Prengës ende nuk është gjetur. E vetmja pamje që Prokuroria ka është një moment ku trupi i Jan Prengës nxirret nga Range Rover-i dhe futet në një furgon të bardhë. Që prej atij momenti askush nulk flet se ku është groposur trupi i viktimës. Janë kryer kontrolle të shumta dhe kërkime në vend ku dyshohet se ai mund të jetë groposur por deri më tani pa rezultat.
