KOSOVË– Qeveria e Kosovës pritet që këtë të mërkurë të marrë vendimin për të ndaluar hyrjen mallrave nga Serbia në territorin e Kosovës. Kjo pasi pasditën e sotme tre efektivë të Policisë së Kosovës janë rrëmbyer në veri nga forcat serbe. Kryeministri i Kosovës, Albin Kurti ka thënë se përveç agresion ky është edhe synim për destabilizim.
Ndërkohë në lidhje me rrëmbimin e efektivë nga foract serbe ka reaguar dhe Presidentja e Kosovës Vjosa Osmani. Osmani shprehet se ky është agresion nga ana e Serbisë, ndërsa shton se ky akt tregon se Serbia nuk është e interesuar për paqe e stabilitet në rajon, por për destabilzim.
Vjosa Osmani: Kidnapimi i tre zyrtarëve policorë brenda territorit të Republikës së Kosovës është agresion nga ana e Serbisë. Ky akt dëshmon edhe njëherë se Serbia nuk është e interesuar për paqe e stabilitet në rajon, por për të shkaktuar destabilizim të Kosovës dhe gjithë rajonit. Akti i sotëm dëshmon se Serbia vazhdon të veprojë me logjikën e së kaluarës, tendencat hegjemoniste të së cilës kanë shkaktuar krime të tmerrshme dhe shumë viktima. Policia e Kosovës ka treguar përkushtim e vendosmëri për ta ruajtur rendin dhe ligjin për të gjithë qytetarët pa dallim, ndaj një akt i tillë kërkon një reagim të ashpër dhe veprim të unifikuar të komunitetit ndërkombëtar ndaj tendencës së Serbisë për destabilizim të rajonit. Zyrtarët policorë duhet të lirohen menjëherë dhe pa asnjë kusht! Institucionet e Kosovës nuk do të heqin dorë nga angazhimi për sundimin e ligjit, sikurse edhe nga përkushtimi për paqe e stabilitet afatgjatë!
