Mbi 700 persona janë të angazhuar në operacionin e kërkim-shpëtimit për gjetjen e një 29-vjeçari që u zhduk pas një rrëshqitjeje masive dheu në zonën e Klosit. Ngjarja ndodhi më 3 maj 2025, rreth orës 14:30, në afërsi të fabrikës së përpunimit të kromit në zonën e njohur si “Qafa e Burrelit”.
Gjatë momentit të rrëshqitjes, 29-vjeçari po punonte me ekskavator për një kompani private të shfrytëzimit të mineraleve, kur masivi i dheut dhe inerteve e zuri dhe e mbuloi plotësisht. Sipas Ministrisë së Mbrojtjes, lëvizja e dheut ka qenë aq e fuqishme, sa ka përshkuar rreth 2 kilometra, ndërsa gjurmë të rrëshqitjes janë vërejtur deri në 6 kilometra larg nga pika fillestare.
Kërkimet kanë hyrë në ditën e pestë, me përfshirjen e strukturave vendase dhe mbështetje nga Kosova. Në operacion janë të angazhuar:
- AKSEM (Autoriteti për Sigurinë dhe Emergjencat në Miniera): 74 punonjës dhe pajisje speciale si kamera termike dhe skanera nëntokësorë.
- Forcat e Armatosura të Shqipërisë: 115 efektivë nga reparti 1013 Burrel, 12 nga Baza e Emergjencave dhe 24 nga Batalioni i Xhenios, me pajisje për zbulimin e metaleve.
- Policia e Shtetit: 24 efektivë.
- Agjencia Kombëtare e Burimeve Natyrore: 6 specialistë.
- Urgjenca Mjekësore: e pranishme për ndihmë shëndetësore të menjëhershme.
- Vullnetarë: 535 qytetarë dhe dy ekskavatorë të përfshirë aktivisht në kërkime.
- Strukturat vendore: Bashkia Klos, Bashkia Mat dhe Prefektura e Dibrës.
- Ekip nga Kosova: 12 efektivë të Forcës së Sigurisë së Kosovës dhe dy qen të specializuar në kërkime nën rrënoja.
Për shkak të terrenit të vështirë dhe masës së madhe të dheut, kërkimet po zhvillohen me vështirësi të mëdha. Ekipet po punojnë me mjete të rënda dhe teknologji të avancuar për të arritur te vendndodhja e mundshme e punëtorit të zhdukur.
Operacioni po koordinohet nga Autoriteti Kombëtar për Sigurinë dhe Emergjencat në Miniera, në bashkëpunim me Agjencinë Kombëtare të Mbrojtjes Civile dhe strukturat e tjera shtetërore e lokale. Të gjitha forcat mbeten të përkushtuara deri në përfundimin e operacionit dhe lokalizimin e trupit të 29-vjeçarit.
