Rrezikohet siguria kombëtare e Shqipërisë!
Rrezikohet siguria kombëtare e Shqipërisë! Ja informacionet që kanë marrë hacker-at
Kapitullim përpara hacker-ave.
Çdo dokument i shtetit shqiptar, informacion 
sekret, shkresë, email zyrtar, tashmë ndodhet në duart e hacker-ave të huaj, të cilët përgjatë 1 jave me radhë, mbajtën nën kontroll portalin e-Albania dhe kanë shkarkuar gjithçka ndodhej aty.
E-Albania ofron shërbimet online për qytetarët dhe u nevojitën disa ditë për ta rekuperuar atë.
Pre e sulmit kibernetik ranë edhe disa faqe ministrish dhe agjencish shtetërore.
Pasi kanë administruar dokumentet e shtetit shqiptar, hacker-at kanë nisur nga puna t’i publikojnë të dhënat që kanë në dorë.
Prej dy ditësh faqja “Homeland Justice”, po shpërndan me anë të videove dhe fotove disa dokumente që i përkasin institucioneve shtetërore shqiptare.
Lidhur me këtë situatë deri më tani nuk ka asnjë siguri nga ana e shtetit shqiptar, për të sqaruar nëse këto dokumente i përkasin vërtetë institucioneve shqiptare?
Dhe nëse po, qeveria duhet të bëjë me dije nëse sulmi i një javë më parë ka arritur të grabisë informacione që rrezikojnë sigurinë kombëtare, apo thjeshtë po bëhet shantazh ndaj shtetit shqiptar.
Lidhur me publikimin e informacioneve dhe shkresave nga ana e “Homeland Justice”, ka reaguar edhe Autoriteti për Sigurinë Kibernetike (AKCESK) si dhe AKSHI, të cilat i kanë kërkuar AKPEP-it, mbylljen e menjëhershme të këtij domaini në Shqipëri.
Siç edhe lexohet në dokument AKCESK dhe AKSHI i kërkojnë AKEP-it mbylljen e menjëhershme të domainit “Homeland Justice”, pasi sipas këtyre institucioneve, kjo faqe po përhap informacione keqdashëse.
Tani është koha dhe momenti që institucionet shqiptare të informojnë qytetarët se sa e rrezikuar është siguria kombëtare, dhe nëse po duhet thirrur me urgjencë Komisioni për Sigurinë Kombëtare, pasi shkresat që mund të jenë publikuar mund të shkaktojnë pasoja edhe më të rënda për shtetin shqiptar.
Informacionet që kanë hacker-at
Sulmi kibernetik duket se ka zhveshur nga çdo informacion sistemin e e-Albania. Çdo e dhënë në këtë portal është tashmë në duart e hacker-ave.
Përgjatë dy ditëve të fundit, ata kanë publikuar disa nga të dhënat që disponojnë në faqen e internetit homelandjustice.ru. Aty janë nxjerrë të dhëna për zyrtarë të shtetit, shkresa, dokumente dhe emaile mes institucioneve. Në shënjestër të sulmit ka qenë edhe drejtorja e AKSHI, Mirlinda Karçanaj të dhënat e të cilët janë publikuar online tashmë.
Hack-erat kanë arritur të marrin të dhëna edhe nga ministritë siç edhe duket në këtë dokument që sjell Syri.net, por edhe nga Komisioni Qendror i Zgjedhjeve, nga ku janë shkarkuar file të tëra me materiale.
Publikimi i të dhënave
Kujtojmë që vetëm pak muaj më parë në Shqipëri plasi skandali i të dhënave personale, i listës së pagave, si dhe targave të makinave. Kjo do të thotë se nëse hakerat mund të kenë arritur të marrin informacione më të detajuara nga ana e institucioneve shqiptare gjatë sulmit kibernetik, atëherë jo vetëm të dhënat personale, por edhe e ardhmja e qytetarëve të vendit mund të pasohet me kërcënime serioze.
