Disa ditë më parë një tërmet shkatërrues goditi Marokun duke u cilësuar si tërmeti më i fuqishëm në një shekull. Kjo ishte nata e katërt radhazi që të mbijetuarit nga tërmeti fjetën sërish në tenda. Sipas Reuters dhe duke cituar informacione nga Ministria e Brendshme, numri i të vdekurve ka shkuar në 2,862 të vdekur, ndërsa 2,562 janë plagosur.
Qeveritë nga e gjithë bota nxituan për të ofruar ndihmë duke përfshirë këtu Francën, Gjermaninë, Italinë, Shtetet e Bashkuara, së bashku me Kombet e Bashkuara, por qeveria marokene ka qenë e ngadaltë për të pranuar çdo lloj ndihme.
Ekipet e shpëtimit paralajmëruan se shanset për të gjetur të mbijetuar nën rrënoja ishin shumë të pakta, kryesisht për shkak të natyrës së katastrofës, pasi ndërtesat më të dëmtuara ishin prej tullash që pothuajse u shembën plotësisht.
