Përplasi me skaf për vdekje vogëlushen/ Sa vite burg rrezikon efektivi Arjan Tase
Agjencia e Mbikëqyrjes Policore duke rindërtuar ngjarjen e rëndë të ndodhur mesditën e së martës, ku një vogëlushe 7-vjeçare u përplas me skaf nga një efektiv policie i cili ndodhej me pushime me familjen në plazhin e Potamit, zbulon akuzën e ngritur ndaj tij.
“Vrasje e kryer nga pakujdesia”, është akuza e ngritur ndaj efektivit Arjan Tase, vepër penale e parashikuar nga neni 85 i Kodit Penal, për efektivin i cili deri dje mbante detyrën e shefit të Seksionit të Policimit në Komunitet në Komisariatin e Policisë Elbasan.
Po çfarë dënimi parashikon ky nen? Maksimumi që efektivi Tase rrezikon të qëndrojë pas hekurave është 5 vite burg, çka do të thotë se ai mund të dalë edhe më herët nga qelia.
Neni 85- Vrasja e kryer nga pakujdesia dënohet me gjobë ose me burgim gjer në pesë vjet.
AMP tha ndër të tjera se në vendin e quajtur plazhi i Potamit, në kundërshtim me rregullat e qarkullimit ujor, shtetasi Arjan Tase ka futur mjetin lundrues në hapësirën ujore të përcaktuar për pushuesit. Kjo hapësirë ujore ka qenë e rrethuar me bova plastike, sipas përcaktimeve në aktet ligjore që normojnë këtë aktivitet.
Pasi ka zbarkuar në breg personat e tjerë në bord, Tase ka kryer manovrime të pakujdesshme për të kthyer mjetin lundrues sërish në det të hapur. Nga këto manovrime të pakujdesshme, 15 metra larg bregut, drejtuesi i mjetit Arjan Tase, ka goditur me pjesën e prapme të mjetit lundrues, shtetasen e mitur J.A., duke i shkaktuar plagë të rënda që kanë sjellë humbjen e menjëhershme të jetës.
