Sot, deputeti i Partisë Demokratike Ervin Salianji feston 37-vjetorin, duke qenë i burgosur në burgun e Fierit.
Deputetja e PD Ina Zhupa ka uruar kolegun e tij për përvjetorin e ditëlindjes. Zhupa shprehet se Salianji është sot një i burgosur politik dhe se është në qeli vetëm pse pati guximin të denoncojë vjedhjet e qeverisë. Më tej, Zhupa shprehet se ditëlindjen e radhës të Salianjit do e festojmë duke punuar për shqiptarët pas fitores së 11 majit.
“Ditëlindjen e 37 Ervin Salianji po e kalon në qelinë nr 6 të burgut politik!
Sot është ditëlindja e nënkryetarit të grupit, deputetit, mikut Ervin Salianji. Asnjëherë në këto vite nuk e kam uruar publikisht por kësaj radhe është ndryshe.
Është ndryshe sepse Ervini nuk e feston me bashkëpunëtorët, me demokratët, me miqtë dhe me familjen e tij por e feston i mbyllur me ata që kanë berë korrupsion, kanë vrarë, e kanë vjedhur.
Ervini qëndron atje si i burgosur politik sepse denoncoi, sepse foli, sepse dërgoi në burg një të kërkuar nga drejtësia italiane, sepse bëri opozitë, sepse fitonte në zonat ku punonte, sepse ishte i rrezikshëm me fjalën dhe punën e tij në fushatë.
Edhe 100 vite të lumtura, i fortë, i vërtetë, kurajoz dhe luftëtar. Ditëlindjen e ardhshme do e festojmë duke punuar për shqiptarët pas fitores së 11 Majit”, shkruan Zhupa.
