TIRANË– Kryetari i Partisë Demokratike Sali Berisha ka folur sot për herë të parë në lidhje me zërat që po qarkullojnë brenda grupit parlamentar për zgjedhjen e Ervin Salianjit në krye të grupit. Duke folur për gazetarët jashtë selisë kryedemokrati tha se do të pranonte vullnetin e demokratëve. Kreu i PD tha se ai do të pranonte pa asnjë diskutim vullnetin e deputetëve demokratë.
Pyetje: A do të jepnit pëlqimin tuaj nëse deputetët zgjedhin kryetar grupi Salianjin?
Sali Berisha: Unë do të pranoj vullnetin e demokratëve. Zoti Salianji është nënkryetar, unë do të pranoj pa diskutim vullnetin e deputetëve të Partisë Demokratike.
Mbrëmjen e djeshme Enkelejd Alibeaj përjashtoi nga grupi parlamentar katër deputetë, konkretisht, Oerd Bylybashin, Tritan Shehun, Agron Shehajn dhe Belind Këlliçin. Lista e firmëtarëve të këtij vendimi nuk është bërë ende publike ndërkohë të shumtë kanë qenë deputetët që e kanë kundërshtuar këtë vendim. Newszone mësoi mbrëmjen e djeshme se veprimi i Alibeajt ishte bërë nxitimthi pasi donte të prishte kourumin mes deputetëve pas lajmit se deputetët demoktratë kanë firmosur shkarkimin e tij dhe emrimin e Ervin Salianjit në krye.
