TIRANË– Kryetari i Partisë Demokratike Sali Berisha komentoi mbledhjen e firmave nga deputetët nga Ervin Salianji për shkarkimin e Enkelejd Alibeajt si kryetar grupi. Kreu i PD-tha se kemi të bëjmë me krijimin e një vakance pas largimit të Luçiano Boçit pasi ai do të kandodojë për kreun e bashkisë së Elbasanit në zgjedhjet e 14 majit. Ai shtoi se vullneti i deputetëve do të respektohet por sipas tij po ashtu do të respektohen dhe procedurat ligjore dhe statutore pasi sipas statutit të ndryshuar në Kuvendin e 11 dhjetorit, kreu i grupit parlamentar zgjidhet me votim të fshehtë nga Këshilli Kombëtar.
Sali Berisha: Asnjë shkelje, por jemi para një rrethane të tillë, nënkryetari i PD-së, Boçi ka vendosur dhe është përzgjedhur për qytetar të parë të Elbasanit. Në këtë rast ai mund të mbajë funksionin e nënkryetarit të partisë por jo atë të grupit parlamentar. është krijuar një vakancë. Në këtë kontekst, Salianji është një nënkryetar grupi parlamentar. Vullneti i deputetëve do të respektohet por dhe procedurat ligjore. Nuk ka asnjë shkelje.
Tre ditë më parë Enkelejd Alibeaj përjashtoi nga grupi parlamentar katër deputetë, konkretisht, Oerd Bylybashin, Tritan Shehun, Agron Shehajn dhe Belind Këlliçin. Lista e firmëtarëve të këtij vendimi nuk është bërë ende publike ndërkohë të shumtë kanë qenë deputetët që e kanë kundërshtuar këtë vendim. Newszone mësoi mbrëmjen e djeshme se veprimi i Alibeajt ishte bërë nxitimthi pasi donte të prishte kourumin mes deputetëve pas lajmit se deputetët demoktratë kanë firmosur shkarkimin e tij dhe emrimin e Ervin Salianjit në krye.
