TIRANË- Mësimi në shkollat e Tiranës do të vijojë normalisht më 6 dhjetor, ditën kur në kryeqytet do të zhvillohet Samiti BE-Ballkani Perëndimor. Këtë e ka bërë të ditur moinistrja e Arsimit dhe Sportit Evis Kushi, e cila me anë të një njoftinë në rrjetin social Facebook shkruan se ky samit është një ngjarje historike për Shqipërinë. Ministrja fton mësuesit e të gjithë vendit për të ndarë me nxënësit opinionet për rrugëtimin e Shqipërisë drejt BE-së.
POSTIMI I EVIS KUSHIT:
E detyruar nga pyetja e vazhdueshme “A do jenë pushim shkollat në datën 6?” po e ripërsëris se ditën e martë, datë 6 dhjetor, mësimi do të vijojë normalisht në të gjitha shkollat e Tiranës. Samiti BE-Ballkani Perëndimor, i cili do të mbahet në Tiranë më 6 dhjetor është një ngjarje e jashtëzakonshme dhe historike për Shqipërinë. Për herë të parë, të gjithë liderët e BE-së mblidhen në një vend jashtë BE-së për një samit të Këshillit Evropian. Ky është nder dhe vlerësim i madh për vendin tonë, por s’ka arsye për të ndaluar procesin mësimor. Madje i ftoj të gjithë mësuesit, në të gjithë vendin, që ta shfrytëzojnë këtë ditë kaq të veçantë për të ndarë me nxënësit opinionet për rrugëtimin e vështirë evropian të atdheut tonë. Ndjesë për të gjithë ata që mund të jenë keqinformuar nga media të ndryshme, rrjetet sociale apo burime të tjera jozyrtare dhe mësim të mbarë!
