Policia e Shkodrës ka vënë në pranga një 68-vjeçar i identifikuar si Gjon Marashi, banues në fshatin Gimaj, Shkodër pasi akuzohet për kultivim të lëndëve narkotike dhe në banesën e tij janë gjetur municion luftarak.
Ndalimi i tij është bërë në kuadër të operacionit të koduar “Konglomerat”, ku gjatë një kontrolli në banesë nga Policia, ky shtetas u kap në flagrancë duke u kujdesur për 120 bimë kanabisi që kishte kultivuar në një sipërfaqe toke në afërsi të banesës së tij.
Shërbimet e Policisë gjetën dhe sekuestruan në cilësinë e provës materiale 1 armë zjarri automatik, municion luftarak, 31 kallëpe tritoli, 110 metër fitil zjarrpërcjellës, 18 granata dore dhe 13 ndezës të unifikuar.
Në vijim të veprimeve procedurale, shërbimet e Policisë asgjësuan me anë të djegies, 120 bimët narkotike të kultivuara në afërsi të banesës së 68-vjeçarit, përveç një pjese që u sekuestrua në cilësinë e provës materiale.
Vijojnë hetimet për identifikimin dhe kapjen e shtetasve të tjerë të përfshirë në këtë veprimtari kriminale.
