TIRANË– Kryeministri Edi Rama i është përgjigjur akuzave të biznesmenit Irfan Hysenbelliut pas shembjes së ‘Prestige Resort’ nga IKMT në Kavajë. Në një postim në Twitter kreu i qeverisë shkruan se ajo që ka bërë Hysenbelliu është roli i viktimës pasi iu shemb një pallat pa leje, gjë që sipas tij është e barabartë me një drejtues mjeti që ankohet se përse policia nuk e lë të drejtojë makinën pa patentë. Akuzave se shembja erdhi për shkak të linjës editoriale të mediave News 24 dhe Panorama të drejtuara nga Hysenbelliu Rama tha se kjo nuk ka lidhje. Sipas tij, pas këtij operacioni, asnjë ndërtues nuk do t’i bëjë dot karshillëk ligjit. Rama thotë gjithashtu se do të futet një normë e re ligjore dhe çdo 60 ditë do të ketë një kontroll të detyruar në lidhje me ndërtimet pa leje.
“Një leje zhvillimi është njësoj me një leje ndërtimi sa ç’është një çertifikatë lindjeje baraz me një leje drejtimi!Të bësh viktimën e lirisë së medias pse t’u prish një pallat pa leje është njësoj si të bësh viktimën e dhunës policore pse s’të lënë ta ngasësh makinën pa patentë! Ky operacion i përfolur, përqeshur e anatemuar nga gjithë kundërshtarët tanë s’ka asnjë lidhje me median.Ka të bëjë vetëm me fundin e një historie mizerabël babëzie ndërtimesh në shkelje të ligjit për qëllime fitimi!Zor se ndonjë ndërtues do i bëjë dot karshillëk ligjit paskëtaj!Janë deri tani 15 vendime konfiskimi. Kjo e sotmja s’është e vetmja prishje, e në ndërkohë kontrollet po vazhdojnë. Do të futet një normë e re ligjore për kontrollin e detyruar sistematik (maksimumi çdo 60 ditë) të zbatimit të lejeve të ndërtimit. Të tjerat janë llogje pa lidhje”, shkruan Rama në Twitter.
