LUSHNJE– Një 66-vjeçar ka rënë në prangat e Policisë së Lushnjes pasi akuzohet se ka plagosur me thikë një 22-vjeçar në një Fast-Food. Agim Cili u arrestua menjëherë ndërsa mësohet se i riu ishte kamarier në Fast-Food. Ngjarja ka ndodhur për motive të dobëta pasi sipas bluve të Lushnjes 66-vjeçari ka qenë në gjendje të dehur. 22-vjeçari i identifikuar me inicialet L.M është dërguar në spitalin e Lushnjes dhe ndodhet nën kujdesin e mjekëve.
NJOFTIMI I POLICISË:
Goditi me thikë 22-vjeçarin, gjatë një konflikti të çastit, vihet në pranga autori. Rreth orës 12:40, në ambientet e një fast food-i, në lagjen “Xhevdet Nepravishta”, dyshohet se gjatë një konflikti të çastit, për motive të dobëta, shtetasi A. C., 66 vjeç, në gjendje të dehur, ka goditur me mjet prerës (thikë), shtetasin L. M., 22 vjeç, kamarier në këtë fast food. Menjëherë pas marrjes së njoftimit, shërbimet e Policisë kanë kapur dhe shoqëruar shtetasin A. C., në Komisariat. Shtetasi L. M. po merr mjekim në spitalin e Lushnjës. Po kryhen veprimet nga grupi hetimor, për zbardhjen e plotë të rrethanave të ngjarjes.
