Kryeministri në detyrë i Kosovës, Albin Kurti, ka liruar nga detyra zëvendësministrin e Administrimit të Pushtetit Lokal, Arbër Vokrri, një ditë pas deklaratave të tij kontroverse ndaj diplomatëve ndërkombëtarë.
Në një intervistë për televizionin KTV, Vokrri kishte akuzuar disa diplomatë të huaj, përfshirë ambasadorin e Bashkimit Evropian në Kosovë, Aivo Orav, se kanë nxitur trazira në veriun e Kosovës.
Zyra e Kryeministrit reagoi menjëherë, duke theksuar se këto deklarata nuk përfaqësojnë qëndrimin zyrtar të Qeverisë së Kosovës dhe se për këtë arsye, Vokrri është liruar nga posti që mbante.
Tensionet në veriun e Kosovës, kryesisht të banuar nga komuniteti serb, kanë qenë të larta veçanërisht pas vitit 2022, kur u nis procesi i zëvendësimit të targave serbe me ato të Kosovës. Ato kulmuan në shtator 2023 me një sulm të armatosur ndaj Policisë së Kosovës në Zveçan, ku mbeti i vrarë një rreshter policie dhe tre sulmues serbë.
Si pjesë e masave për shtrirjen e autoritetit shtetëror, autoritetet kosovare kanë mbyllur dhjetëra institucione paralele serbe në atë zonë.
