Nga Edon KUQI
Kërkesa e Prokurorisë së Posaçme, e cila kërkonte arrestimin e Arben Ahmetaj ishte lajmi i ditës së djeshme që do të vijojë dhe sot e mbase gjithë këtë javë të nxehtë korriku, që nxehet akoma më shumë nga “kusia” e zezë e lajmeve të korrupsionit që prodhon qeveria. Ky nuk ishte lajm që nuk pritej madje ky veprim i SPAK mbase duhet të ishte bërë më herët. E gjithë karriera e Arben Ahmetaj në Partinë Socialiste është e mbushur me shkëlqime dhe rënie deri dje kur ra në gropën që kishte hapur vetë. Për këtë e kishte ndihmuar dhe “shefi” i madh, i cili deri më tani ka “kyçur” gojën.
Gjashtë raste të vërtetuara korrupsioni rëndojnë mbi Arben Ahmetajn gjatë kohës që mbante detyrën e ministrit të Financave dhe Ekonomisë, portofolin e shtetit shqiptar që me bekimin e të madhit e ktheu një buxhet personal duke përfituar para e vila, apartamente e trualle nga persona që sot rezultojnë të shpallur në kërkim por që fatkeqësisht vijojnë të marrin paratë e shqiptarëve për inceneratorë që i kanë dyert e mbyllura dhe nuk përpunojnë plehra. “Koka” e Arben Ahmetaj nuk duhet të ishte e vetmja që shkonte para drejtësisë, nëse do të shkojë siç duhet deri atje.
Nëse SPAK do të bindte shqiptarët se po e bën punën siç duhet atëherë hetimi duhet të kishte filluar nga lart se “peshku qelbet nga koka”, thotë populli. Sot kemi një ish-Sekretar të Përgjithshëm të Ministrisë së Mjedisit në burg dhe një ish-ministër të këtij dikasteri pas hekurave. SPAK e ka ndarë çështjen e inceneratorëve në 1000 pjesë të ndryshme për të hallakatur mendjen e këtij mileti që mendon se prangat në duart e një zyrtari janë provë që drejtësia funksionon dhe kur ky zyrtari del atëherë nuk ke më se ç’të flasësh.
Arben Ahmetaj një nga besnikët e Ramës në Partinë Socialiste gjithmonë është parë me “zili” nga të tijët brenda llojit për ngjitjen e shkallës në qeveri dhe krah Ramës por besoj se kur kanë parë fundin e atyre që Rama i mbante afër janë gëzuar që nuk ishin “kaq të besuar” për të.
Më 26 shkurt të 2016 Arben Ahmetaj do të merrte zyrtarisht në dorëzim portofolin e varfër të shqiptarëve të cilin e katandisi më keq se e gjeti . E gjithë karriera e tij në këtë dikaster është mbulura nga hije korrupsioni, tenderash dhe abuzimesh që shumëkush mbyllte sytë se i “hapnin” xhepin.
Por pastaj miku i Ramës u ngjit në karrigën e numrit dy të ekzekutivit duke marrë karrigen e zëvendëskryeministrit e marrë dhe drejtimin e Ministrisë së Rindërtimit, dikaster i krijuar pas tërmetit të 26 nëntorit. Ky është një nga dikasterët që dhe sot është i mbuluar me hije dyshimi sa i përket prokurimit të tenderave, dhënies së tyre dhe abuzime kolasale me paratë e shqiptarëve që shumë prej tyre tre vite pas tërmetit jetojnë ende në çadra dhe kapanone. Në këtë ministri ishte dhe Alma Klosi, fenomenja e 500 mijë euro që u vodh nga pastruesja e që u harrua si çështje bashkë me mijëra eurot që nuk gjetën kurrë zot.
Ndarja e madhe mes Ramës dhe Ahmetajt ndodhi korrikun e shkuar. Pas akuzave të ngritura për inceneratorët Edi Rama bëri atë që di të bëjë më mirë, të distancohet nga rasti dhe ta hedhë “besnikun” në gojë të miletit të uritur për drejtësi por që ngopet vetëm me thela të vogla mishi. Ndarje mes tyre ishte e qartë, që korrikun e shkuar në koridoret e politikës dhe medias flitej se Ahmetaj do të kishte fatin e Saimir Tahirit, nuk kishte dyshim se treshja e dikurshme tashmë do të mbetej vetëm me të “madhin”, i cili dje me sa duket konfirmoi treshen e re me Gjiknurin dhe Ballën që e ngjiti në postin e ministrit në kohën më të zezë për Policinë e Shtetit të mbushur me skandale.
Por si erdhëm deri këtu?
Shumë zëra thonë se kjo është strategjia e re e Edi Ramës, kryeministrit më jetëgjatë në detyrë pavarësisht se i rrethuar nga skandale që do të “shkatërronin” figurën e tij ai ia ka dalë të qëndrojë “i pastër”. Në kohën kur një kryebashkiak i trumbetuar si “kali” i fitoreve nga Edi Rama si Safet Gjici u kap me “hallate” përjashta në zyrën e shtetit duke dhënë tendera e projekte me afera seksuale, kur ish-kryebashkiaku i Durrësit është prapa hekurave për korrupsion, kur terrori i Fushë Krujës tashmë i ka dalë nga kontrolli Edi Rama gjeti thelën e re të mishit për t’ua hedhur shqiptarëve në këtë vapë korriku.
Nuk ka dyshim se Arben Ahmetaj është një i korruptuar që ka përfituar para nga buxheti i shqiptarëve por a veproi i vetëm ai? Nuk ka dyshim që jo. Kjo është strategjia e re e Ramës, këtij “strategu” të madh që sa herë i rrezikohet karrigia i lëshon një nga një të tijët, siç bëri me Saimir Tahiri, “mikun” e mirë të dikurshëm që pavarësisht se akuzohej për trafik droge e çoi të takonte Obamën në SHBA, e në fund i futi brrylin dhe e degdisi në burg, pavarësisht se jo për atë që duhej të akuzohej por mbase ishte çoka e fundit e tij.
A do të ketë Arben Ahmetaj, “tigri” i rilindjes fatin e Saimir Tahirit? Kjo mbetet për tu parë, por pyetje që në fakt duhet të shtrohet është, a do të ketë guxim Arben Ahmetaj që të flasë?/Newszone
