SHKODËR– Dedë Nika i arrestuar nga policia vendore e Shkodrës si autori i dyshuar i vendosjes së tritolit tre vite më parë në banesën e efektivit të policisë Prelë Milani, ka dalë këtë të hënë para togave të zeza në Shkodër, ku mësohet se ka mohuar akuzat e ngritura ndaj tij. Në seancën për masën e sigurisë që u zhvillua një ditë më parë, 33-vjeçari ka treguar se nuk është ai autori i vendosjes së tritolit në banesën e efektivit Milani dheKolë Bungaja, ngjarje të ndodhura brenda një nate më 4 janar 2020.
“Unë nuk kam asnjë lidhje me vendosjen e tritolit tek banesa e Prelë Milanit apo Kolë Bungajës. Nuk kam asnjë dijeni për ato ngjarje. Po ashtu unë nuk kam asnjë konflikt as me efektivin e policisë Prelë Milani dhe as me shtetasin tjetër Kolë Bungaja. Nuk i njoh asnjërin dhe as tjetrin dhe nuk e di përse jam këtu”
Dedë Nika u vu në prangat e policisë në janar të këtij viti në kuadër të operacionit të koduar “Mesazhi”. Ky i fundit mësohet se për rreth një muaj policia ka përgjuar në mjedise të ndryshme, ku 33 vjeçari në përgjime ka lënë të kuptohet se është ai autori i vendosjes së tritolit në banesën e policit Prelë Milani dhe Kolë Bungaja, 3 vite më parë. Nika është i dyshuar për veprat penale “shkatërrimi i pronës me eksploziv” si dhe “mbajtja pa leje e armëve luftarake shpërthyese”, kryer në bashkëpunim.
