Nga Edon KUQI
Deklarata e bërë një ditë më parë nga kryeministri Edi Rama, e cila ishte “De facto” shkrirja e projektit të “Ballkanit të Hapur” të propozuar dhe iniciuar nga ai dhe presidenti serb Aleksandër Vuçiç duket se do të shkaktojë një “divorc” politk mes të dyve që gjithmonë janë parë dhe si miq të mirë me nëri-tjetrin. Kështu një ditë më parë kreu i qeverisë gjatë fjalës së tij në Ulqin ku u prit nga kryeministri në detyrë i Malit të Zi Dritan Abazoviç tha se nisma “Ballkani i Hapur” e ka përfunduar misionin për të cilin ka lindur, e se ai ka qenë një nismë për të shtyrë përpara Procesin e Berlinit.
Edi Rama: Procesi i Berlinit është tani më aksi ynë kryesor. Ballkani i Hapur ishte një iniciativë e cila lindi nga nevoja për ta shtyrë përpara Procesin e Berlinit, dhe e ka kryer tani atë mission për të cilin lindi. Ne duhet të futemi me kokë tani në Procesin e Berlinit, sepse e kemi këtë mundësi, e kemi në Tiranë. Kemi mundësinë ta zotërojmë si proces, me mbështetjen e madhe që kemi nga Gjermania, nga Kancelari Scholz por edhe nga gjithë të tjerët.
Por ky qëndrim i Ramës bie ndesh me deklaratat e bëra me parë prej tij por dhe me mbrojtjen në kufijtë e “ekstremes” që ai i ka bërë “Ballkanit të Hapur” tek aleatët ndërkombëtar kryesisht gjermanë të cilët gjithmonë kanë skeptikë për të mos thënë prerë që ishin kundër. Fundi i krijeses së tij duket se nuk e ka shqetësuar shumë Ramën por nga ana tjetër Vuçiç është konfuz. Në një prononcim për mediat këtë të dielë ai është shprehur se nuk e beson deklaratën e kryeministrit të Shqipërisë ose mbase ai ka dashur të shprehet ndryshe dhje është keqkuptuar.
Alëksandër Vuçiç: Nuk besoj se Rama e ka thënë këtë. Shpresoj të kem mundësi ta shoh së shpejti. Ballkani i Hapur është një ide autonome dhe autoktone e njerëzve nga Ballkani. Kjo është shprehje e dëshirave dhe marrëdhënieve tona, jo diçka që e bëjmë nën sundimin e dikujt tjetër.
Por “Ballkani i Hapur” u ttrumbetua fort nga Rama dhe në “shkrirje” të projektit që kurrë nuk u implemetua gjërësisht në rajonin e Ballaknit Perëndimor nuk nguroi ti jepte vetes dhe merita që nuk i kishte duke shfrytëzuar situatën në veri të Kosovës dhe lirimin e tre efektivëve të rrëmbyer. “Ballkani i Hapur” apo i ndarë më mirë i Edi Ramës dështoi në përpjekje për të zgjidhur krizën në Kosovë pavarësisht se po mundohet të trrumbetohet e kundërta.
Gjithmonë Kosova është parë si “armike” e kësaj nisme dhe Rama nuk ka nguruar kurrë që dhe pse ishte në tryezë me Vuçiçin, Abazoviçin apo ish-kryeministrin e Maqedonisë së Veriut Zoran Zaev dhe aktualit Dimitar Kovaçevski ta shpallte Albin Kurtin si “armik” të bashkimit ekonomik të Ballkanit që në fakt përfitonte më së shumti veç Serbia. Nuk dihet ende se çfarë fshihet apo luhet pas tërheqjes së Ramës, i cili nuk mund ta ketë marrë i vetëm këtë vendim.
A është kjo një ndërhyrje amerikane për të paralajmëruar Vuçiç se pas sanksioneve evropiane ndaj qeverisë së Kurtit tashmë po i hiqen privilegjet dhe përfitimet ekonomike që rridhnin nga Ballkani i Hapur? A ka gisht Amerika në vendimin e Ramës, dhe a po përdoret ky i fundit për ti çuar një mesazh Vuçiçit?! Kjo mbetet për tu parë. Një gjë është e sigurt se ky vendim i Ramës ka idhtuar shumë ata që mezi e prisnin dhe ka lumtuar shumë ata që e kundërshtuan!/Newszone
