TIRANË– Kryetarja e Kuvendit Lindita Nikolla ka reaguar këtë të dielë në lidhje me ngjarjen e rëndë ku shoferi i saj bashkë me vëllezërit e rij dhunuan familjen Kaçi në Hamallaj. Madje Martin Nikolla qëlloi në ajër me pistoletën e shërbimit. Nikolla shkruan se ngjarja është e dënueshme dhe falenderon Policinë për reagimin.
Lindita Nikolla: Ngjarja e ndodhur sot në Hamallaj, ku është përfshirë efektivi i Gardës së Republikës (që nga viti 2006) Martin Nikolli është e dënueshme. Dëshiroj të përshëndes Policinë e Shtetit për ndalimin e menjëhershëm të personit në fjalë dhe të inkurajoj organet e drejtësisë për zbardhjen sa më të shpejtë të ngjarjes dhe dënimin e kujtdo që ka gisht në këtë rast flagrant, pavarësisht pozicionit ku ka shërbyer deri më sot.
Në të njëjtën kohë, solidarizohem plotësisht me familjen Kaçi dhe i siguroj se institucionet e Republikës janë të angazhuara dhe në krye të detyrës për t’i ofruar të gjithë mbrojtjen që parashikon ligji.
