TIRANË– Një 30-vjeçar i identifikuar me inicialet A.K është arrestuar nga Policia e Tiranës ndërsa nën hetim është vënë motra e tij e identifikuar me inicilalet Xh.K 32 vjeçe. Sipas njoftimit të Policisë i ri është kapur me 2.5 kg drogë që dyshohet se do e shpërndante në shkollat afër zonës së ‘Don Boskos’. E motra është vënë nën hetim nga blutë e Tiranës pasi në momentin e arrestimit ajo u mundua të fshehë lëndën narkotike që poseidonte i vëllai.
NJOFTIMI I POLICISË:
Në vijim të punës për parandalimin, evidentimin dhe goditjen e veprimtarisë kriminale në fushën e narkotikëve, specialistët e Seksionit për Hetimin e Narkotikëve, bazuar dhe në informacionet e siguruara nga inteligjenca informative për një rast të shpërndarjes së lëndëve narkotike, kanë organizuar dhe finalizuar operacionin policor të koduar “Location”. Gjatë operacionit, në zonën e Don Boskos, shërbimet e Policisë kanë lokalizuar dhe ndaluar shtetasin A. K. Gjatë kontrollit fizik dhe kontrollit të ambientit përreth u gjetën disa qese farmaceutike me lëndë të dyshuar narkotike kanabis sativa. Në vijim të operacionit, shërbimet e Policisë kanë ushtruar kontroll në ambientet e brendshme dhe të jashtme të banesës së shtetasit A. K., ku kanë gjetur sasi të ndryshme lënde të dyshuar narkotike kanabis sativa, rreth 250 doza të kësaj lënde narkotike të paketuara me qese farmaceutike, peshore elektronike dhe qese të tjera farmaceutike që do të përdoreshin për ndarjen e lëndës narkotike në doza. Në cilësinë e provës materiale u sekuestruan në total rreth 2.5 kg lëndë e dyshuar narkotike kanabis sativa, qeset farmaceutike, 3 peshore elektrike dhe 3 aparate celulare. Në përfundim të veprimeve u bë arrestimi në flagrancë i shtetasit A. K., 30 vjeç, banues në Tiranë, për veprën penale “Prodhimi dhe shitja e narkotikëve”. Gjithashtu, u referuan materialet në prokurori dhe nisi procedimi në gjendje të lirë për shtetasen Xh. K., 32 vjeçe (motra e të arrestuarit), për veprën penale “Veprime që pengojnë zbulimin e së vërtetës“, pasi ka tentuar të fshehë lëndën narkotike që mbante vëllai i saj, në banesë. Materialet i kaluan Prokurorisë, për veprime të mëtejshme.
