Ditën e premte kanë shpërthyer sërish zjarret në Siçilinë veriore dhe të paktën dy persona kanë humbur jetë.
Agjencia e Mbrojtjes Civile dhe mediat italiane njoftojnë se 700 turistë u evakuuan nga një hotel për disa orë.
Një grua 42-vjeçare u vra në përpjekje për të shpëtuar kuajt e saj në Cefalù, në lindje të Palermos.
Babai dhe vëllezërit e saj ishin me të, por ajo me siguri u çorientua nga vapa dhe tymi dhe ra në një përroskë.
Agjencia italiane e lajmeve Ansa raportoi gjithashtu se një 68-vjeçar vdiq duke u përpjekur të largohej nga shtëpia e tij, e cila u përfshi nga flakët në Balestrate, në perëndim të Palermos.
Rreth 700 klientë të hotelit Costa Verde, pranë Cefalu, u evakuuan pasditen e së premtes dhe u dërguan për arsye sigurie në një stadium, por ata mundën të ktheheshin në dhomat e tyre rreth orës 2 të mëngjesit të së shtunës pasi rreziku kishte kaluar.
Shërbimi meteorologjik parashikon reshje shiu nga sot dhe për disa ditë në rajon, gjë që do të ndihmojë punën e zjarrfikësve në Siçilinë veriore.
