Tirana është vlerësuar vazhdimisht nga agjencitë ndërkombëtare si ‘kryeqyteti i ndotjes’ në kontinent.
Elbasani mbulohet çdo ditë nga tymi kancerogjen.
Vlora pushtohet rregullisht nga zjarri dhe tymi helmues, madje edhe në kulmin e sezonit turistik.
Durrësi me betonizimin e tij do jetë shumë shpejt një qytet i pabanueshëm për shkak të ngrohjes ekstreme, thonë ekspertët e huaj.
Fieri, Korça, Shkodra e shumë qytete të tjera janë thjesht imitime të këtyre të mësipërmëve.
Edhe pse nuk ka një industri reale, Shqipëria është një nga vendet më të ndotura në planet.
Sëmundjet kancerogjene po kapin nivele alarmante, alergjitë dhe problemet e mushkërive kanë mbushur spitalet. Problemet shëndetësore tek fëmijët për shkak të ajrit të pistë janë në rritje vertikale.
Kjo është Shqipëria që ka ndërtuar Edi Rama.
Megjithatë, ‘lideri global’ u ka dhënë leksione fuqive të mëdha gjatë një samiti për ndryshimet klimatike. Lajmi se Rama ka folur në mesin e shteteve të mëdha për ndotjen, duke i akuzuar se s’po bëjnë asgjë kundër saj, ka eksituar mediat e qeverisë.
“Vendosa ta lë mënjanë fjalimin tim të mirëpërgatitur sepse ndërkohë që prej ditës së djeshme shihja ekranet e heshtura të televizorëve në sallën e pritjes së udhëheqësve ku organizatorët kishin menduar me kujdes të shtonin bimë të gjelbra mbi kolltukët e rehatshëm. Njerëzit aty hanë, pinë, takohen dhe bëjnë foto së bashku. Ndërsa pamje fjalimesh pa zë nga udhëheqësit vazhdojnë të shfaqen papushim në sfond. Por jeta vazhdon me zakonet e saj të vjetra dhe fjalimet tona të mbushura përplot me fjalë të mira për të luftuar ndryshimin e klimës. Nuk ndryshojnë asgjë. Edhe më keq, ashtu siç Sekretari i Përgjithshëm i Kombeve të Bashkuara e theksoi dje, emetimet e karbonit faktikisht janë rritur gjatë këtij viti,” tha Rama.
Por ndërsa këtë fjalim të Ramës do e gjeni në çdo media qeveritare, mos prisni të gjeni asnjë lajm për ndotjen e frikshme në Shqipëri që po merr jetë njerëzish.
Mos prisni lajme për atë që ndodh në Tiranë, Elbasan, Vlorë e kudo që ka shkuar modeli i Edi Ramës që prodhon vetëm sëmundje dhe vdekje.
