ELBASAN– Është shtyrë sërish seanca gjyqësore ndaj ish-ministrit të Brendshëm Saimir Tahiri në Gjykatën e Elbasanit. Ish-ministri kërkoi që t’i njihen ditët e paraburgimit dhe lehtësirat nga qëndrimi atje. Më herët ishte kërkuar përjashtimi i gjyqtarit Elis Dine, i cili është zëvendësuar nga Elton Frashëri.
Frashëri kërkoi kohën e mjaftueshme për t’u njohur me përmbajtjen e dosjes gjyqësore. Në nisje të seancës, Tahiri nuk ka qenë i pranishëm në sallën e gjyqit dhe trupi gjykues ka vendosur që seanca të zhvillohet më 17 janar.
Gjykata e Posaçme Kundër Korrupsionit dhe Krimit të Organizuar (GJKKO) e dënoi Saimir Tahirin me 5 vite burg për ‘Shpërdorim të detyrës’, por për shkak se ish-ministri kishte kërkuar aplikimin e procedurës së gjykimit të shkurtuar, iu ul 1/3 e dënimit, e tani Tahirit i duhet që të qëndrojë pas hekurave të burgut në 3 vite e 4 muaj burgim. Tahiri u dënua vetëm për “Shpërdorim detyre” duke i ‘shpëtuar’ akuzave “Korrupsion të zyrtarëve të lartë”, “Trafik të lëndëve narkotike kryer në bashkëpunim” dhe “Grup të strukturuar kriminal”.
