TIRANË– Kryetari i Komisionit Qëndror të Zgjedhjeve Ilirjan Celibashi ka folur sërish këtë të mërkurë në lidhje me ‘fatin’ e Partisë Demokratike në zgjedhjet vendore të 14 majit dhe se cila prej PD-ve do të regjistrohet. Sipas tij çdo gjë do të bëhet sipas rregullave dhe se ka vetëm një PD dhe zgjidhjen e këtij ngërçi do e japë vendimi i Gjykatës së Apelit më 3 mars.
Pyetje: A keni krijuar një bindje se cilën PD do të regjistroni në zgjedhje dhe a besoni se më 3 mars do të marrë zgjidhje ky konflikt i PD?
Ilirjan Celibashi: Ka vetëm një PD që nëse do të plotësojë kushte do të regjistrohet. Do të regjistrohet. Kur të paraqitet kërkesa do të vlerësojmë dokumentacionin bashkëshoqërues të kërkesës për regjistrim dhe cilësinë e personave që e paraqesin. Gjykata do të vendosë më datë 3 se cili do të jetë organi udhëheqës për Partinë Demokratike. Kjo është një procedurë e nevojshme dhe nuk lidhet vetëm për procesin e regjistrimit në zgjedhje. Duhet të jetë e qartë se kush është në pikëpamje formale, organ drejtues i asaj partie.
Sa i përket shpërndarjes së fondeve për partitë politike në zgjedhjet e 14 majit Celibashi tha se gjithçka është e sqaruar në nënin 180 dhe se askush nuk do të marrë më pak se 130 milionë lekë.
Ilirjan Celibashi: Është një vendim që do të duhet ta marr dhe s’po e bëj publik. Ligji ka përcaktuar në nenin 180 që merr fonde partia që ka marrë pjesë në zgjedhjet pararendëse në 2019. E dimë që PD s’mori pjesë por neni 180 ka përcaktuar në referim do merren sipas rastit të 2015 dhe 2017. Ka një përjashtim që për ato që s’kanë marrë pjesë në këto zgjedhje do merret në konsideratë procesi i 2019. Ne nuk kërkojmë fond se është cështje që i takon Kuvendit dhe vendos se sa para do të vendosim në dispozicion të partive politike për fushatën e tyre zgjedhore. Ky fond nuk do jetë më i vogël se 130 milionë. Megjithatë është cështje e Kuvendit dhe nuk kemi obligim. Ne kemi bërë një lloj kujtese që ka fonde që vihen në dispozicion të cilat janë apo alokojmë me qëllim që të marrim masat.
