Situata në Kosovë, Borrell: Tërheqja e serbëve nga institucionet nuk është zgjidhje

Ngjarjet në Kosovë dhe përshkallëzimi i tensioneve me Serbinë “vënë në rrezik vite të tëra pune të palodhur” për normalizimin e marrëdhënieve ndërmjet Beogradit dhe Prishtinës, ndërsa tërheqja e të gjithë serbëve të Kosovës nga institucionet vendore “nuk është zgjidhje për mosmarrëveshjet aktuale”. Në një deklaratë të lëshuar të shtunën, përfaqësuesi i Lartë i BE-së për Punët e Jashtme dhe Politikën e Sigurinë, Josep Borrell, u bëri thirrje palëve të përmbahen nga çdo veprim i njëanshëm që mund të tensionojë më tej situatën.

“Zhvillimet e fundit në marrëdhëniet ndërmjet Kosovës dhe Serbisë i vënë në rrezik vitet e punës së palodhur dhe arritjet e arritura në kuadër të dialogut të ndërmjetësuar nga BE-ja ndërmjet Beogradit dhe Prishtinës dhe pengojnë situatën e sigurisë në rajon dhe më gjerë”, tha Borrell.

“Tërheqja e serbëve të Kosovës nga institucionet e Kosovës nuk është zgjidhje për mosmarrëveshjet aktuale. Ajo ka potencialin për të përshkallëzuar më tej tensionet në terren,” vazhdoi ai.

BE u bën thirrje serbëve të Kosovës që të kthehen tek autoritetet lokale dhe “të përmbushin detyrat e tyre”, theksoi Borrell. Ai gjithashtu u bëri thirrje autoriteteve të Kosovës “të respektojnë detyrimet e tyre pa vonesë”. “Kjo do të thotë zgjatje e menjëhershme e procesit të riregjistrimit të automjeteve dhe pezullim i çdo veprimi ndëshkues ndaj mbajtësve të targave. Çështja e targave mund të zgjidhet nga palët në kuadër të dialogut,” theksoi Borrel.

Tensionimi i situatës në veri erdhi pasi serbët u tërhoqën nga të gjitha institucionet e Kosovës. Lideri i serbëve të Kosovës, Goran Rakiq, deklaroi se partia e tij, Lista Serbe, do të largohet nga qeveria e Kosovës. Deputetët serbë njoftuan se do të largoheshin nga parlamenti, më pas gjyqtarët dhe kryetarët e komunave njoftuan dorëheqjen e tyre.