TIRANË– Nuk ka dakordësi mes demokratëve dhe socialistëve në Komisionin e Reformës Teritoriale. Deputetët që mbështesin Enkelejd Alibeajn kërkuan që kandidatëve për kryeatarë bashkie nëse nuk do të arrijnë dot fitoren tu jepet mundësia që të jenë pjesë e Këshillave Bashkiakë. Po kështu Alibeaj kërkoi që listat e kandidatëve për anëtarë të Këshillit Bashkiak të jenë të hapura dhe kandidatët të marrin vota preferenciale siç ndodhi në zgjedhjet e 25 prillit me kandidatët për deputetë.
Po ashtu në mbledhjen e sotme, socialistët nuk pranuan as kërkesën për të zgjatur afatin kohor prej 4 muajsh të parashikuar në Kod, që nuk lejon shfrytëzimin e burimeve shtetërore në lidhje me tenderat apo politikat ekonomike dhe sociale. Ndërsa nga ana tjetërGjiknuri propozoi që të marren parasysh edhe propozimet e ekspertit të Fatmir Mediut, i cili kërkon rikthimin e koalicioneve.
Mbledhja është shoqëruar me debate në lidhje me zbatimin e rregullores nga dy bashkëkryetarët, Enkelejd Alibeaj dhe Damian Gjiknuri, por edhe me Petrit Vasilin, i cili u ankua se nuk merrte dot të drejtën e fjalës.
PJESË NGA PËRPLASJA:
Damian Gjiknuri: Vasili unë isha korrekt, lash dhe zotin Alibeaj që të sqarohej. Unë mund të kem mendimin tim, i cili është politik, por mund të ketë një mendje juridike që mund të bindë anëtarët. Do dëgjoj opinionet, se unë mund të kem mendim politik si minidrejtues i kësaj mbledhje.
Enkelejd Alibeaj: Ne nuk jemi bashkë, unë jam vetëm këtu. Jam me ekspertët e mi. Nga ekspertët është vetëm një që ka propozuar, si zoti Sefa. Asnjë tjetër s’ka propozuar asgjë. Këtë dua të bëj me dije. I vetmi që ka propozuar është Indrit Sefa. Është e drejta e çdo eksperti që të propozojë në varësi të atyre që përfaqëson dhe mbron. Ndaj ai foli. Duhet të zbatojmë rregulloren. Ndaj secili të shprehë vullnetin për këtë çështje. I pari që kërkoi fjalën ishte zoti Çollaku.
Damian Gjiknuri: Zoti Vasili, para se t’ua jap fjalën për procedurë….do jua jap mo, një sekondë.
Enkelejd Alibeaj: Eksperti juaj është njohur, nuk ka sjell asnjë propozim. Pse të humbasim kohë. Është koha tashmë që secili prej deputetëve të shprehë vullnetin e vetë.
Petrit Vasili: Ky është komisioni i deputetëve të Kuvendit, ekspertët janë ndihmës, lehtësues të këtij procesi. Aq është e vërtetë sa që produktin e tyre, kjo tavolinë mund ta mbështesë apo ta rrëzojë. Ju them administrojeni siç është për t’u drejtuar këtë komision. Jeni thjesht lehtësues të standardit, boll është bajatosur ky komision. Jepini standard. Drafti është një i vetëm. Nuk ka mendime alternative mesa kam parë. Kjo është pjesa e atij që quhet debat politiko-teknik. Sa më parë të futemi në këtë lloj debati, aq më mirë është. Këto shpenzime kohësh parazite na fusin në përplasje.
