Përfaqësuesi i Nismës Thurje, Pano Soko i ftuar në emisionin “Të Paekspozuarit” në MCN, paralajmëroi se ditën e nesërme ai do të denoncojë një dosje në SPAK për aferën me fondet e IPARD.
Soko paralajmëroi se në dosje është detajuar se si këto para kanë shkuar në xhepat e të afërmve të zyrtarëve të lartë.
Ndërkohë lidhur me aferën e sterilizimit, Soko shpjegoi se sa është shpenzuar nga fondi dhe se si këto para të marra nga qytetarët shqiptarë janë “zhdukur”. Soko tha se ai pret nga SPAK që hetimi i tyre të tregojë se ku kanë shkuar paratë e marra nga 3 kompanitë nënkontraktore.
“Nesër do të ketë një denoncim të radhës, ku do bëhet në lidhje me një aferë po kaq të madhe. Fondet e IPARD, që ishin destinuar për fermerët por kanë përfunduar nëpër xhepat e të afërmve të zyrtarëve.
Problemi kryesor i sterilizimit, fillimisht ajo u mor borxh për të ndërtuar një qendër për sterilizimin dhe çfarë bëri VKM-ja, u mor qendra dhe u dha koncesionarit privat falas pa asnjë lloj pagese, tarifonte shtetin.
E dyta nëse do të kishim vendosur të blinim çdo vit pajisje të reja kirurgjikale, do të kushtonte 11 mln euro në vit, e di sa shkon sterilizimi I pajisjeve të vjetra ka shkuar 15 mln euro në vit. Ndërkohë ne sterilizojmë pajisjet që kemi.
Këto lekët e kostove ku kanë shkuar, kompanitë nënkontraktore ku i çojnë. Ky është hetimi që unë pres nga SPAK.”, tha Soko.
