Efi Dhedhes tregoi në “Më lër të flas” se ajo dhe Kiara Tito nuk kanë komunikuar ende me njëra-tjetrën, por theksoi se e mirëkupton Kiarën në këtë vendim, për shumë arsye.
“Ne nuk jemi zënë. E keni parë videon? Keni parë që unë nuk e kam mbështetur? Ideja është që edhe tituj e portaleve janë ‘[Efi] sulmon [Kiarën]’, ‘[Efi] i vihet kundër [Kiarës]’. Unë nuk i jam vënë kundër askujt. Unë thjesht kam shprehur opinionin tim, siç e bëj gjithmonë. Unë nuk mund të them diçka ndryshe, kur ai ishte mendimi im dhe në atë rast; nuk e hodha poshtë Kiarën,” u shpreh Efi.
Vajzat ishin shoqe brenda shtëpisë së “Big Brother VIP Albania”, një raport që u duk sikur u trondit disi pasi Kiarës iu tregua nga produksioni i BBVA një klip me tituj portalesh, ndër të tjera, ku në disa prej tyre shkruhej “Efi sulmon Kiarën”, “Efi i del kundër Kiarës”. Bëhët fjalë për deklaratën e Efit mbi një episod të komentuar të BBVA, ku Luizi dhe Armaldo bllokuan Kiarën në një cep të lavamanit për t’i prishur lojën e dhënë nga “Vëllai i madh”. Sipas Efit, ndryshe nga çfarë u komentua në studio, Luizi nuk kishte ushtruar dhunë, sepse ishin në një lojë, të cilën Kiara mund ta kishte stopuar nëse ndihej keq.
E pyetur nga vëllezërit Veshaj për më shumë detaje mbi raportin e tyre tani, Efi tha:
“Nuk e di [se çfarë mendon Kiara]. Në mënyrën si u tregua, nuk e fajësoj që u mërzit sepse ishte një fragment, nuk arriti të kuptonte pse unë po e bëja atë video. Jashtë nuk kemi pasur mundësi për t’u sqaruar. Unë e kuptoj shumë mirë që pjesa e daljes nga Bigu është shumë e ngarkur. Po pres thjesht momentin që ajo të ketë dëshirë për të folur, nëse ka dëshirë.”
Ato u panë duke biseduar në studio pak momente pas eliminimit të Kiarës. “[Kur po flisnim në studio], unë i thashë të merrte kohën e saj, të mos takonte shumë njerëz, që të parandalonte stresin dhe ankthin për informacionet që do merrte. I dhashë këshilla që ajo të ishte më e qetë,” shtoi ajo./Anabel
