Biletat për ndeshjen e 12 tetorit midis Shqipërisë dhe Çekisë kanë avulluar brenda pak orësh.
“Air Albania” do të jetë i tejmbushur për një nga ndeshjet më të rëndësishme të Kombëtares në këto dekadat e fundit, me misionin për të siguruar një biletë që për shumëkënd ka qenë i pamundur.
Kanë qenë plot 200 mijë kerkesa për 22 mijë vende në stadium, që në fillim dihej se do të ishte e vështirë, por në këtë rast, si asnjë herë më parë të gjithë ata që kanë dashur të sigurojnë një biletë janë përballur me një situatë të pazakontë.
Fluksi i madh i kërkesave e bëri jashtëzakonisht të vështirë aksesin në linkun përkatës, ku kushdo që kërkonte të hynte përballej me një radhë prej 6 mijë apo 4 mijë kërkesash që ishin më para dhe i duhej të priste në radhë, që për të thënë të vërtetën për vetë numrin e jashtëzakonshëm të përdoruesve bëhej thuajse e pamundur për t’u respektuar.
Të shumtë kanë qenë njerëzit që kanë pritur me orë për një biletë, por më kot sepse fluksi e ka gjetur të papërgatitur dhe vetë personelin që merret me menaxhimin e faqes.
Gjithsesi rezultati është se biletat janë shitur brenda pak orësh me stadiumin që ishte shitur me gjithë kapacitetin e tij që në orët e para të mëngjesit, e madje për ironi të fatit, kërkesat e jashtëzakonshme dhe nxitimi për të blerë një biletë ka bërë që të shiten edhe gjithë biletat për sfidën Partizani – Egnatia, të Kategorisë Superiore ku natyrisht është e lehtë të kuptohet se në këtë rast në nxitim për të siguruar një biletë shumëkush sapo ka pasur mundësinë të akesojë në link ka bërë blerjen pa u kujdesur të shikonte se bëhej fjalë për takimin e Kategorisë Superiore dhe jo për atë të kombëtares.
