Polici Afrim Bunjaku ra dje në krye të detyrës, teksa Policia e Kosovës po shkonte në një aksion në veriun e vendit, ku u përball me një bandë serbësh të armatosur.
Në nder të Bunjakut, sot Kosova është në ditë zie, ndërsa nderime për të ka menduar edhe Tirana. Në kryeqytetin e Shqipërisë, sot pritet të mbahen homazhe në nderim të Bunjakut.
Gazetari Marin Mema ka bërë thirrje në rrjetet sociale, që të gjithë shqiptarët të bashkohen në këtë homazh, për të nderuar heroin e Kosovës.
“Pa fjalë, pa ngjyra politike e patriotizëm bosh, por me vepra! Sonte në ora 19:00 takohemi tek sheshi “Nënë Tereza” në Tiranë (pranë universitetit) për t’i bërë homazh Afrim Bunjakut, policit që u vra nga terroristët serbë në Kosovë! Kosova nuk është vetëm.
Sonte në ora 19:00 jepi kohë dashurisë për Kombin! Homazhi ndaj dëshmorit Afrim Bunjaku është respekt ndaj Kombit! Të ndezim një qiri, të vendosim një lule, të jemi aty edhe thjesht me njëri-tjetrin për shpirtin e një heroi që jetën e dha për të mbrojtur trojet shqiptare! Ky homazh nuk ka lidhje me politikën, por vetëm me Kombin! Vetëm me Kombin! Bëhu pjesë! Sot është dita të jemi bashkë me ngjyrat e flamurit! Unë do të jem, duhet të jemi të gjithë‼”, shkruan Marin Mema.
Situata në veriun e Kosovës gjatë ditës së djeshme ishte tepër problematike, ndërsa sot raportohet se gjendja është qetësuar. Institucionet e Republikës së Kosovës kanë ulur flamujt në gjysmë-shtizë. Prokuroria Speciale ka thënë gjatë ditës së sotme se janë duke u lokalizuar disa vende, ku mendohet se fshihen armë.
