Kujtim Cakrani, avokati i Ilir Metës, ka mbërritur në Gjykatën e Posaçme, ku më 19 shtator do të shqyrtohet kërkesa për ndryshimin e masës së sigurisë për kryetarin e Partisë së Lirisë. Ndërkohë, më 9 tetor, në Gjykatën e Lartë do të shqyrtohet rekursi i bërë nga Meta për masën e sigurisë, e cila është caktuar që një vit nga Gjykata e Posaçme dhe është mbajtur në fuqi deri tani. Rekursi vjen pas vendimit të apelit të Gjykatës së Posaçme që nuk e ndryshoi masën ndaj Metës.
Më 29 gusht, Prokuroria e Posaçme Kundër Korrupsionit mbylli hetimet dhe e dërgoi për gjykim Ilir Metën dhe Monika Kryemadhin, me akuza për korrupsion pasiv, pastrim parash dhe mosdeklarim të pasurisë.
SPAK pretendon se gjatë hetimeve janë zbuluar skema korrupsioni dhe abuzime me pushtetin. Përveç Metës dhe Kryemadhit, janë dërguar për gjykim edhe tre persona të tjerë. Seanca e parë paraprake do të zhvillohet më 25 shtator dhe dosja do të shqyrtohet nga gjyqtarja Irena Gjoka, e cila do të vendosë nëse e kalon për gjykim, e kthen në SPAK apo e pushon hetimin.
