TIRANË– Prokuroria e Posaçme Kundër Korrupsionit dhe Krimit të Organizuar (SPAK) ka mbyllur hetimet për çështjen e inceneratorit të Fierit. SPAK ka kaluar dosjen në gjykatë dhe ka ngritur akuzën e korrupsionit dhe shpërdorimit të detyrës për ish-deputetin e Partisë Socialiste, Alqi Bllako. Akuza do t’ju komunikohet edhe personave të tjerë të akuzuar për këtë çështje, përfshirë edhe ish-ministrin e Mjedisit Lefter Kokën, i cili ndodhet në burg.
Alqi Bllako u arrestua më 31 mars të këtij viti, i dyshuar si i përfshirë në aferën e inceneratorit të Fierit, duke firmosur disa shkresa që tjetërsuan truallin e tokës. Pas disa muajsh në qeli, Gjykata e Posaçme e nxori nga qelia dhe e dërgoi në “Arrest në shtëpi” ish-deputetin. Prokuroria Speciale njoftoi që në seancë se nuk e pranonte këtë vendim, pasi akuzat dhe provat për Alqi Bllakon ishin konkrete. Në këto kushte, SPAK bëri ankimim dhe më 9 nëntor 2022, Gjykata e Posaçme e Apelit e riktheu përsëri në qeli ish-deputetin.
