Agjencia meteorologjike spanjolle ka ngritur përsëri alarmin e përmbytjeve masive, teksa në një njoftim të ri ka paralajmëruar se brenda 12 orëve të ardhshme do të ketë rreth 140 mm shi në rajonin jug-perëndimor të vendit. Në këtë njoftim të ri thuhet se orët më kritike do të jenë ato prej orës 09:00-12:00. Shirat pritet të kenë një intensitet të lartë, teksa autoritetet u kanë bërë thirrje banorëve të mos dalin nga banesat e tyre. Gjiri i Huelvas pritet të jetë më i prekuri nga kjo valë e dendur shirash, ndërsa edhe Ekipi i emergjencave në Andaluzi ka njoftuar se në rajonet e Aracena, Andévalo dhe Condado është ndezur alarmi portokalli sa i përket shirave dhe alarmi i verdhë për stuhitë.
Autoritetet gjithashtu kanë paralajmëruar për përkeqësimin e kushteve të motit dhe shira të dendur në rajonet e Tarragona, Castellón, Menorca dhe Mallorca. Sipas meteorologëve toka e këtyre zonave tashmë është totalisht e ngopur nga shirat e kaluar dhe në këtë valë të dytë, pritet që në këto rajone të ketë përsëri përmbytje masive. Ndërkohë ditën e shtunë pritet të kemi një zbutje të rreshjeve të shiut, teksa dita e dielë mendohet të jetë një ditë e thatë në të gjithë Gadishullin Iberik.
Ndërkohë numri i viktimave për momentin qëndron ende në 158, por zyrtarët spanjollë në deklaratat e tyre kanë thekuar se dhjetëra persona rezultojnë ende të zhdukur. Ekipet e kërkim – shpëtimit vazhdojnë ende operacionet, teksa situata paraqitet e vështirë, pasi shumica e sipërfaqes është mbuluar nga balta. Përllogaritja e dëmeve vazhdon, teksa qeveria spanjolle ka deklaruar se do të dalë me një paketë ndihme specifike për të gjithë qytetarët e prekur nga përmbytjet.
