Policia Kombëtare Spanjolle ka zhvilluar një aksion të gjerë në rajonin O Salnés të Galicisë, ku ka goditur një rrjet të organizuar të trafikut të drogës. Si rezultat i këtij operacioni, janë arrestuar tetë persona, ndër ta edhe një shtetas shqiptar që jetonte në zonën e Bueu.
Operacioni u zhvillua njëkohësisht në disa komuna si Vilanova, Poio, Bueu dhe Marín, ku u kryen kontrolle të befasishme në banesa dhe biznese të dyshuara. Njësia speciale GRECO e policisë spanjolle, me mbështetjen e forcave të ndërhyrjes nga Madridi dhe Vigo, bastisi pesë pika kyçe të rrjetit, duke sekuestruar sasi droge dhe prova të tjera që lidhen me aktivitetin kriminal.
Hetimet kanë zbuluar se ky grup i dyshuar mund të ketë lidhje me rastin e shkurtit të kaluar, kur 120 kilogramë kokainë u gjetën të fshehura në trupin e një anijeje tregtare ruse në portin e Marín. Sipas burimeve të hetimit, rrjeti lokal i përbërë kryesisht nga persona në rajonin Arousa merrej zakonisht me shpërndarje në sasi më të vogla, por kishte kontakte të dyshimta me organizata më të mëdha ndërkombëtare.
Shqiptari i arrestuar dyshohet se mund të ketë pasur një rol të rëndësishëm si ndërlidhës mes grupeve vendase dhe trafikantëve nga jashtë, por hetimet janë ende në zhvillim dhe autoritetet nuk kanë dhënë shumë detaje, pasi operacioni mbetet sekret.
Ndër të sekuestruarat ishin rreth 160 gramë kokainë, 30 gramë heroinë dhe 100 gramë marijuanë. Pavarësisht se sasia e drogës e kapur në këtë fazë nuk është e madhe, autoritetet theksojnë se vlera e vërtetë e këtij operacioni qëndron në çmontimin e një rrjeti me lidhje të fuqishme dhe ndikim në trafikun ndërkombëtar.
